देवगड तालुक्यातील फणसे समुद्रकिनाऱ्यावर शीर नसलेला अज्ञात मृतदेह आढळून आला. या घटनेमुळे परिसरात मोठी खळबळ उडाली आहे. अंगावर आकाशी रंगाचा टी-शर्ट आणि क्रीम रंगाची हाफ पँट असल्याने मृतदेह पुरुषाचा असल्याचे स्पष्ट झाले असून, अंदाजे वय ४५ वर्षांच्या आसपास असल्याची शक्यता व्यक्त करण्यात येत आहे.

स्थानिक नागरिकांनी हा मृतदेह पाहताच तत्काळ पोलिसांना माहिती दिली. घटनेची माहिती मिळताच देवगड पोलीस तातडीने घटनास्थळी दाखल झाले आणि पंचनामा करून मृतदेह ताब्यात घेतला. मृतदेह ओळख पटवण्यासाठी आणि मृत्यूचं नेमकं कारण समजून घेण्यासाठी शवविच्छेदनासाठी पाठवण्यात आला आहे.

या प्रकरणाचा तपास देवगड पोलीस करत असून, घातपात करून मृतदेह समुद्रात फेकला गेला की अपघात झाला? याबाबत सध्या तपास सुरू आहे.

दरम्यान, या घटनेमुळे फणसे परिसरात मोठी चर्चा सुरू असून, शीर नसलेल्या अवस्थेत मृतदेह सापडल्यामुळे हा घात की अपघात याबाबत विविध कयास लावले जात आहेत. शवविच्छेदन अहवाल आल्यानंतरच मृत्यूचे खरे कारण स्पष्ट होईल, असं सांगण्यात आलंय.