Shiv Sena Symbol: महाराष्ट्रात शिवसेना कुणाची असा प्रश्न मागील काही दिवसांपासून विचारला जात होता. मात्र आता शिवसेनेचे पक्ष चिन्ह गोठवण्याचा निर्णय निवडणूक आयोगाने घेतला आहे.

दरम्यान, निवडणूक आयोगाने (Election Commission) शिवसेनेचे (Shiv Sena) धनुष्यबाण चिन्ह गोठवले आहे. त्यामुळे आता ठाकरे आणि शिंदे गटाला हे चिन्ह वापरता येणार नाही. विशेष म्हणजे, दोन्ही गटांना शिवसेना पक्षाचे नाव देखील वापरता येणार नाही. नव्या चिन्हासाठी सोमवारी दुपारी एक वाजेपर्यंत निवडणूक आयोगाला पर्याय द्यायचे आहेत, अशी माहिती मिळत आहे.

दुसरीकडे, उद्धव ठाकरे (Uddhav Thackeray) गटाने आज त्यांच्याकडील महत्त्वाची कागदपत्रे आयोगाला सादर केली होती. शिवाय अंधेरीच्या पोटनिवडणुकीमध्ये शिंदे गटाचा कोणताही उमेदवार नाही मग पक्ष चिन्ह का मागतायत असा सवाल देखील ठाकरे गटाने आयोगासमोर केला होता.

तसेच, मुख्यमंत्री एकनाथ शिंदे (Eknath Shinde) यांनी अद्याप उद्धव ठाकरेंच्या पक्षप्रमुख पदावर दावा केलेला नाही. दिल्लीमध्ये आमच्याकडे तब्बल दहा लाखांपेक्षा अधिक शपथ पत्रे तयार आहेत. त्याचबरोबर अडीच लाख पदाधिकाऱ्यांची शपथपत्रे आणि दहा लाखांपेक्षा अधिक प्राथमिक सदस्यांची शपथपत्रे आहेत. मात्र ती सादर करण्यासाठी आम्हाला चार आठवड्यांचा कालावधी देण्यात यावा, अशी मागणी ठाकरे गटाकडून आयोगाकडे करण्यात आली होती.