मुंबई: राज्यातील भारतीय जनता पक्षामध्ये (BJP) संघटनात्मक बदल होण्याबद्दल वेगवेगळ्या चर्चा सध्या सुरु आहेत. मागच्या काही दिवसांत भाजप नेत्यांचे दिल्ली दौरे वाढले आहेत, हे देखील या चर्चांमागील कारण आहे. भारतीय जनता पक्षाचे प्रदेशाध्यक्ष चंद्रकांत पाटील यांच्याकडून हे पद काढून घेण्याच्या देखील शक्यता राजकीय विश्लेषकांकडून वर्तवल्या जाता आहेत. राज्याचे विरोधीपक्ष नेते देवेंद्र फडणवीस यांनी देखील आता याबद्दल एक महत्वाचा खुलासा केला आहे. (Devendra Fadnavis replied to the discussions to change the president of Maharashtra BJP)

राज्यात मागच्या काही दिवसांपासुन भारतीय जनता पक्षात सुरु असलेल्या हालचाली पाहता, येणाऱ्या काळात भारतीय जनता पक्षाच्या प्रदेशाध्यक्षपदी नवा चेहरा पहायला मिळु शकतो अशी चर्चा सुरु होती. मात्र या विषयावर बोलताना भाजपनेते देवेंद्र फडणवीस यांनी या विषयाला पुर्णविराम दिल्याचे पहायला मिळाले आहे. दिल्ली दौऱ्याचे कारण हे पक्षातील अंतर्गत विषयांसाठी नसुन, केंद्रातील नवीन मंत्र्यांच्या भेटीसाठी सुरु असल्याचे सांगितले आहे.

देवेंद्र फडणवीस यांनी यावेळी बोलताना, चंद्रकांत पाटील यांचे काम चांगले असुन, आम्ही त्यांच्या पाठीशी आहोत, तसेच या सर्व चर्चांमध्ये काहीही तथ्य नसल्याचे स्पष्ट केले. यावेळी देवेंद्र फडणवीस यांनी कांड्या पिकवू नका, चुकीच्या पद्धतिच्या बातम्या तयार करु नका म्हणत, बातम्या लागल्या तर त्या मी देतो अशी खोचक पद्धातिने टोला लगावला.