महाराष्ट्र विधानसभा विरोधी पक्षनेते देवेंद्र फडणवीस यांनी शुक्रवारी भिवंडी येथे आयोजित 'केंद्रीय मंत्री चषक 2022 क्रिकेट स्पर्धेत' खेळण्याचा आनंद लुटला. राजकीय मैदानात आपल्या शाब्दिक फटकेबाजीने विरोधकांना गोत्यात आणण्यासाठी ओळखले जाणाऱ्या फडणविसांनी क्रिकेट (Cricket) मैदानातही जोरदार फटकेबाजी केली. केंद्रीय मंत्री कपिल पाटील (Kapil Patil) यांनी 'केंद्रीय मंत्री चषक 2022 क्रिकेट स्पर्धे'चे आयोजन केले आहे.

फडणवीस यांनी याबाबत ट्वीट करत काही फोटो आणि खेळतानाचा व्हिडिओ शेअर केला. ते ट्विटमध्ये लिहितात, केंद्रीय मंत्री कपिल पाटीलजी यांनी भिवंडी येथे आयोजित केलेल्या केंद्रीय मंत्री चषक 2022 क्रिकेट स्पर्धेला काल उपस्थित राहून शुभेच्छा दिल्या. खेळाडूंना या स्पर्धेसाठी मनःपूर्वक शुभेच्छा दिल्या आणि काही क्षण क्रिकेट खेळण्याचा सुद्धा आनंद घेतला'. याचबरोबर त्यांनी आपल्या इन्स्टाग्राम (Instagram) अकाऊंट वर देखील खेळतानाचा व्हिडिओ शेअर केला. व्हिडिओ बरोबर 'दे घुमाके' गाणे वाजत आहे.