मुंबई - गोवा महामार्गाचे काम मागील बारा वर्षांपासून रखडले असून, हायवेवर अपघाताचे सत्र थांबता थांबेना. दरम्यान, या मार्गावर पनवेल जवळ झालेल्या अपघातात प्रसिद्ध निवेदकाचा जागीच मृत्यू झाला आहे. पंक्चर झाल्याने रस्त्याकडेला थांबलेल्या शिवशाही बसला कार जोरात धडकल्याने हा अपघात झाला.

ठाणे येथील इव्हेंट मॅनॅजमेण्ट करणारे सुप्रसिद्ध निवेदक दीपेश मोरे यांचा या अपघातात जागीच मृत्यू झाला आहे.

मिळालेल्या माहितीनुसार, दीपेश मोरे महाड येथील कार्यक्रम आटपून आपल्या सहकाऱ्यांसह मुंबईच्या दिशेने निघाले होते. पनवेल येथील चिंचवण गावाजवळ उभ्या असलेल्या शिवशाही बसला भरधाव येणाऱ्या कारने जोराची धडक दिली. ही धडक एवढी भीषण होती की यात गाडीतील दीपेश मोरे यांचा जागीच मृत्यू झाला, तर तीनजण जखमी झाले आहेत. चिंचवण गावाच्या हद्दीत शिवशाही बसचा टायर पंक्चर झाल्याने ती रस्त्यावर उभी होती.

अपघात झाल्यानंतरचा एक व्हिडिओ समोर आला आहे. यात कारने थांबलेल्या शिवशाहीला पाठीमागून धडक दिल्याचे दिसत आहे. यात कारच्या समोरील भागाचे मोठ्या प्रमाणावर नुकसान झाल्याचे दिसत आहे.

मोरे अर्टिगा गाडी क्र एमएच 04 जीएम 2495 ही घेऊन चालले होते. गाडीचा अंदाज न आल्याने अर्टिगा गाडी चालकाने शिवशाही बसला पाठीमागून धडक दिली. मोरे यांचा मृत्यू झाला, तर त्यांच्यासोबत असलेले त्यांच्या सहकारी रश्मी खावणेकर आणि श्रद्धा जाधव व कोमल माने या किरकोळ जखमी झाल्या आहेत. जखमी झाल्याने त्यांना लाईफलाईन रुग्णालयात उपचारासाठी दाखल करण्यात आले आहे.