गुरुवारी (१२ जून) अहमदाबाद येथे घडलेल्या भीषण विमान दुर्घटनेने संपूर्ण देश हादरून गेला आहे. या अपघातात एकूण 265 प्रवाशांचा दुर्दैवी मृत्यू झाला असून, यात महाराष्ट्रातील 10 नागरिकांचा समावेश आहे. या दुर्घटनेमध्ये कोकणातील रत्नागिरी जिल्ह्यातील चिपळूण तालुक्यातील धामेली (भोजनेवाडी) गावातील एअर इंडियाच्या क्रू मेंबर अपर्णा महाडिक (वय 35) या तरूणीचा दुर्दैवी मृत्यू झाला.

अपर्णा महाडिक ही गेल्या अनेक वर्षांपासून एअर इंडिया विमान सेवेत कार्यरत होत्या. अपघातग्रस्त बोईंग विमानात त्या नियमित ड्युटीवर होत्या.

गुरुवारी अहमदाबाद येथून एअर इंडिया विमानानं उड्डाण घेतल्यानंतर अवघ्या काही वेळात विमानात तांत्रिक बिघाड झाला आणि ते थेट अहमदाबादमधील इमारतीवर आदळून कोसळले. या भीषण अपघातात अपर्णा यांना आपले प्राण गमवावे लागले.

विशेष म्हणजे, अपर्णा ही रायगडचे खासदार सुनील तटकरे यांचे भाचे अमोल महाडिक यांच्या पत्नी होत्या. अमोल महाडिक हेही एअर इंडियात कार्यरत आहेत. अपर्णा यांच्या मृत्यूची बातमी कळताच तिच्या मूळ गावी आणि सध्या राहत असलेल्या मुंबईतील घरी शोककळा पसरली आहे.

अपघातग्रस्त विमानात 169 भारतीय नागरिक, 53 ब्रिटिश नागरिक, 7 पोर्तुगीज आणि 1 कॅनेडियन नागरिकांचा समावेश होता. सरकारकडून मृतांच्या कुटुंबीयांना नुकसानभरपाई जाहीर करण्यात येणार असल्याचे समजते.

हा अपघात नेमका कशामुळे झाला, याचा तपास सुरू आहे. एअर इंडियाने याबाबत तातडीने उच्चस्तरीय चौकशी समिती नेमली आहे. अपर्णा महाडिक यांचा दुर्दैवी अंत केवळ त्यांच्या कुटुंबासाठीच नव्हे, तर संपूर्ण कोकणवासीयांसाठी मोठा धक्का ठरत आहे.