Mangal Gochar 2026: धरतीपुत्र मंगळाची वक्रदृष्टी! 'या' 3 राशींना बसणार मोठा फटका; आर्थिक चणचण अन् मानसिक ताण वाढणार

Mars Transit in Aquarius February 2026: पौराणिक कथांनुसार जेव्हा भगवान शंकराच्या घामाचे थेंब पृथ्वीवर पडले, तेव्हा त्यातून मंगळ ग्रहाची उत्पत्ती झाली. पृथ्वीने त्याचे पालनपोषण केल्यामुळेच मंगळाला 'धरतीपुत्र', 'भूमिपुत्र' किंवा 'भौम' असे संबोधले जाते. ज्योतिषशास्त्रात मंगळाला ग्रहांचा सेनापती मानले जाते, जो मानवी जीवनातील साहस, ऊर्जा आणि जमिनीशी संबंधित व्यवहारांवर नियंत्रण ठेवतो.

द्रिक पंचांगानुसार, येत्या 23 फेब्रुवारी रोजी मंगळ ग्रह मकर राशीतून बाहेर पडून कुंभ राशीत प्रवेश करणार आहे. कुंभ ही शनीची रास असून शनी आणि मंगळ यांच्यात मैत्रीचे संबंध नसल्यामुळे हा गोचर काळ अत्यंत संवेदनशील मानला जात आहे. जेव्हा शनीच्या राशीत मंगळाचे आगमन होते, तेव्हा मानसिक अस्वस्थता, अचानक होणारे बदल, वादविवाद आणि आर्थिक अनिश्चितता वाढण्याची शक्यता असते. या गोचरमुळे विशेषतः तीन राशींच्या जातकांनी सावधान राहणे गरजेचे आहे.

मेष राशीच्या लोकांसाठी 23 फेब्रुवारीपासूनचा काळ आव्हानात्मक असेल. मंगळाचा कुंभ राशीतील प्रवेश तुमच्या कार्यक्षेत्रात अचानक बदल घडवून आणू शकतो, ज्यामुळे जबाबदाऱ्यांचे ओझे वाढेल. या काळात तुमच्या स्वभावात चिडचिडेपणा आणि राग वाढण्याची शक्यता असून, शुल्लक कारणावरुन इतरांशी खटके उडू शकतात. आरोग्याच्या बाबतीत विशेषतः रक्तदाब आणि डोकेदुखीचे त्रास जाणवू शकतात. अनावश्यक खर्चामुळे तुमची आर्थिक बचत कमी होईल, त्यामुळे गुंतवणुकीचे निर्णय विचारपूर्वक घ्यावेत. कौटुंबिक जीवनातही मतभेद होण्याची शक्यता असल्याने संयम ठेवणे हिताचे ठरेल. उपाय म्हणून दर मंगळवारी शिवलिंगावर शिजवलेला थंड भात आणि कुंकू अर्पण केल्यास मंगळाची उग्रता शांत होण्यास मदत होते.

वृषभ राशीच्या जातकांसाठी देखील हा काळ अस्थिरतेचा संकेत देत आहे. तुमच्या नोकरी किंवा व्यवसायात नवनवीन आव्हाने उभी ठाकतील, तसेच सहकाऱ्यांसोबत किंवा वरिष्ठांसोबत तुमचे मनमुटाव होऊ शकतात. आर्थिक स्थितीवर याचा परिणाम दिसून येईल, त्यामुळे खर्चावर नियंत्रण ठेवणे अत्यंत आवश्यक आहे. मानसिक तणावामुळे तुमची एकाग्रता कमी होऊ शकते, ज्याचा परिणाम कामाच्या गुणवत्तेवर होईल. आरोग्याच्या दृष्टीने पचनसंस्थेशी संबंधित विकार त्रास देण्याची शक्यता आहे. या काळात जमिनीच्या व्यवहारात अडथळे येऊ शकतात. उपाय म्हणून मातीच्या तंदूरमध्ये किंवा चुलीवर बनवलेली गुळाची गोड भाकरी कुत्र्याला खाऊ घातल्यास जमिनीशी संबंधित समस्या दूर होण्यास मदत होईल.

कर्क राशीच्या व्यक्तींना या गोचर काळात कौटुंबिक पातळीवर संघर्षाचा सामना करावा लागू शकतो. घरातील वडीलधारी मंडळी किंवा मुलांसोबत विनाकारण वाद होण्याची शक्यता आहे. कामाच्या ठिकाणी अनिश्चितता निर्माण झाल्यामुळे आर्थिक दडपण वाढेल. या काळात तुम्ही तुमच्या क्रोधावर नियंत्रण मिळवणे सर्वात महत्त्वाचे आहे, अन्यथा साधे वाद देखील विकोपाला जाऊ शकतात. आरोग्याकडे दुर्लक्ष करु नका, विशेषतः हृदय आणि पोटाच्या तक्रारींकडे लक्ष द्या. जीवनातील अडथळे दूर करण्यासाठी तांब्याच्या कलशात थोडे मध आणि गूळ टाकून ते वाहत्या पाण्यात प्रवाहित करणे तुमच्यासाठी लाभदायक ठरेल. मंगळाचा हा बदल संयमाने आणि योग्य उपायांनी हाताळल्यास त्याचे नकारात्मक परिणाम कमी होऊ शकतात.