महाराष्ट्राचे उपमुख्यमंत्री देवेंद्र फडणवीस (DCM Devendra Fadanvis) यांनी राज्यातील युवकांना मोठी घोषणा करून आश्वस्त केले आहे. एक वर्षाच्या कालावधीत राज्यात 75 हजार युवकांना नोकरी देणार असल्याचे त्यांनी म्हटले आहे. तसेच, राज्यातील सरकारी नोकरीवरील अघोषित बंदी उठवली जाईल. असेही त्यांनी म्हटले आहे. नागपूर (Nagpur) येथे दीपोत्सवाच्या पर्वावर उपमुख्यमंत्री देवेंद्र फडणवीस बोलत होते.

दीपोत्सवाच्या पर्वावर हा रोजगार मेळावा देशभरातील विविध ठिकाणी आयोजित केला होता. याच कार्यक्रमात नागपूर येथे आज 213 युवकांना नियुक्तीपत्र देण्यात आले. बँक, रेल्वे, पोस्ट, इन्कम टॅक्स यासह केंद्र शासनाच्या विविध जवळपास 38 विभागांमध्ये ही नियुक्ती होणार आहे. आज एकाच दिवशी देशभरात 75 हजार युवकांना नियुक्ती पत्र दिले गेले. केंद्र शासनामार्फत पुढील 18 महिन्यात 10 लाख तरुणांना विविध शासकीय विभागामध्ये नोकरी दिली जाणार आहे.

"प्रधानमंत्री नरेंद्र मोदी यांनी केंद्रात 10 लक्ष नोकरी भरतीचे लक्ष ठेवले आहे. राज्य शासनालाही अशावेळी मैदानात उतरावे लागेल. मुख्यमंत्री एकनाथ शिंदे (CM Eknath Shinde) व आपल्या नेतृत्वातील राज्य सरकारची तरुणांना नोकरी देणे ही प्राथमिकता असणार आहे. त्यामुळे वर्षभरात 75 हजार युवकांना सरकारी नोकरी दिली जाईल. त्याची सुरुवात लवकरच 18 हजार युवकांची पोलीस दलामध्ये तसेच 10 हजार युवकांची ग्रामविकास विभागातील भरतीद्वारे केली जाईल," अशी घोषणा उपमुख्यमंत्री देवेंद्र फडणवीस यांनी केली.

राज्यातील खासगी क्षेत्रात मोठ्या प्रमाणावर रोजगाराची संधी आहे. खासगी क्षेत्रातील नोकऱ्या मोठ्या संख्येने मिळाव्यात. यासाठी नोकरी देणारे व नोकरी हवे असणारे यांचे प्रत्येक जिल्ह्यात, मतदारसंघ निहाय रोजगार मेळावे आयोजित करणार असल्याचे उपमुख्यमंत्री देवेंद्र फडणवीस यांनी यावेळी सांगितले.