Mumbai Goa Highway Accident

सिंधुदुर्ग: मुंबई - गोवा महामार्गावरुन कोल्हापूर-तुळजापूरला जाणाऱ्या महामंडळाच्या बसचा कंटेनरला धडकून भीषण अपघात झाला आहे. यात २६ प्रवासी जखमी झाल्याची माहिती समोर आलीय.

रविवारी (दि.१५ सप्टेंबर) रोजी सकाळी नऊच्या सुमारास हा अपघात झाला. सिंधुदुर्गातील कसाल डेपोमधून कोल्हापूर - तुळजापूरला जाणाऱ्या या बसमध्ये ४० ते ४५ प्रवासी प्रवास करत असल्याची माहिती आहे.

मिळालेल्या माहितीनुसार, मालवण आगाराची एसटी बस रविवारी सकाळी कसाल येथून कोल्हापूर-तुळजापूरला जाण्यासाठी मार्गस्थ झाली. यात सुमारे ४० ते ४५ प्रवासी प्रवास करत होते. बस सर्व्हिस रोडवर येत असताना रस्त्यावर उभ्या असणाऱ्या कंटेनरला बसने जोराची धडक दिली.

यात सुमारे २६ प्रवासी जखमी झाले असून, त्यांना उपचारासाठी ओरोस येथील सरकारी रुग्णालयात दाखल करण्यात आले आहे. उपलब्ध माहितीनुसार जखमी प्रवशांमध्ये कोणाचीही प्रकृती चिंताजनक नसल्याचे सांगितले जात आहे.

अपघाताचे कारण अद्याप समोर आले नसून, पोलिसांकडून याचा शोध घेतला जात आहे. दरम्यान, बसचा ब्रेक निकामी झाल्याने हा अपघात झाल्याची शक्यात अपघातावेळी उपस्थित असणाऱ्या स्थानिकांनी केला आहे. अपघाताचा अधिक तपास सुरु आहे.