टीम इंडियाचा धडाकेबाज फलंदाज असणाऱ्या ऋद्धिमान साहाला आता भारताच्या कसोटी संघात स्थान देण्यात आलेले नाही. श्रीलंकेविरुद्धच्या कसोटी मालिकेसाठी निवडलेल्या भारतीय संघातून त्याला वगळण्यात आले आहे. तेव्हापासून भारताचा स्टार यष्टिरक्षक फलंदाज चर्चेत आहे. दरम्यान त्याने दिलेल्या मुलाखतीमुळे टीम इंडिया (Team India) पुन्हा एकदा चर्चेत आली आहे. ज्यात त्याने मोठा खुलासा केला आहे. हा खुलासा बीसीसीआय अध्यक्ष सौरव गांगुली (Sourav Ganguly) यांच्याशी संबंधित आहे. साहाचा (Wriddhiman Saha) हा खुलासा गांगुलीकडून मिळालेल्या सांत्वनाशी संबंधित आहे, जे त्याने कानपूर कसोटीनंतर वक्तव्य केले होते. (Wriddhiman Sahas Disclosure Ganguly Said As long As I Am In BCCI You Are In The Team)

साहाने म्हटले की, न्यूझीलंडविरुद्ध (New Zealand) कानपूर कसोटीत 61 धावांची नाबाद इनिंग खेळल्यानंतर मला सौरव गांगुली यांचा एक व्हॉट्सअ‍ॅप मेसेज आला, ज्यामध्ये त्यांनी लिहिले होते - 'मी जोपर्यंत बीसीसीआयमध्ये (BCCI) आहे, तोपर्यंत तु संघात राहणार'. त्या संदेशानंतर माझा आत्मविश्वास वाढला होता. परंतु आता अचानक सर्वकाही बदलले.

साहाने कानपूर कसोटीचा तो किस्सा सांगितला

गतवर्षी नोव्हेंबर अखेरीस खेळल्या गेलेल्या त्या कसोटीदरम्यान ऋद्धिमान साहाला मानदुखीचा त्रास झाला होता. त्यामधूनही त्याने 61 धावांची शानदार खेळी केली होती. मानदुखीचा त्रास एवढा वाढला होता की, तो सामना साहाला अर्ध्यातच सोडावा लागला होता. त्यानंतर केएस भरतला संघात स्थान देण्यात आले होते. तसेच तेव्हा साहाच्या त्या खेळीचे गांगुलीकडून कौतुकही करण्यात आले होते. त्यावेळी साहाने म्हटले होते की, “न्यूझीलंडविरुद्ध 61 धावांच्या नाबाद खेळीनंतर दादांनी (Ganguly) मला व्हॉट्सअ‍ॅपवर मेसेज करुन अभिनंदन केले होते. त्यात त्यांनी म्हटले होते की, ''जोपर्यंत मी बीसीसीआयमध्ये आहे, तोपर्यंत तु संघात राहणार.''

तो पुढे म्हणाला, बीसीसीआय अध्यक्षांचे एवढं मोठं बोलणं ऐकून माझा आत्मविश्वास आणखी वाढला आहे. पण आता मला समजत नाहीये की अचानक सगळं कसं बदललं?

साहाला का वगळण्यात आलं कोणी सांगत नाही?

गांगुलीच्या त्या संदेशाच्या अडीच महिन्यांनंतरचे चित्र पूर्णपणे वेगळे आहे. साहा संघात नाही तर बाहेर आहे. त्याला का वगळण्यात आले हे कोणीच सांगत नाही. निवड समितीचे प्रमुख चेतन शर्मा म्हणाले की, 'आम्ही याबाबत काहीही बोलू शकत नाही.'

संघात निवड न झाल्यानंतर, साहाने असेही म्हटले की, ''मुख्य प्रशिक्षक राहुल द्रविड आणि संघ व्यवस्थापनाने मला निवृत्तीचा विचार करण्यास सांगितले आहे, कारण यापुढे निवडीसाठी माझा विचार केला जाणार नाही.''