Women's T20 World Cup Prize Money: ऑस्ट्रेलियन महिला क्रिकेट संघाने रविवारी महिला टी20 वर्ल्डकप 2023 स्पर्धेचे विजेतेपद जिंकले आहे. ऑस्ट्रेलियाने अंतिम सामन्यात यजमान दक्षिण अफ्रिकन महिला संघाला 19 धावांनी पराभूत केले. ऑस्ट्रेलियन महिला संघाचे हे सहावे टी20 विश्वविजेतेपद होते.

ऑस्ट्रेलिया महिला संघाने 2010, 2012, 2014, 2018, 2020 आणि 2023 अशा सहा वर्षी झालेल्या टी20 वर्ल्डकपचे विजेतेपद जिंकले आहे. दरम्यान सहावे टी20 वर्ल्डकप जिंकल्यानंतर ऑस्ट्रेलियन संघावर कोट्यवधी रुपयांचा वर्षाव झाला आहे.

ऑस्ट्रेलिया महिला संघाला वर्ल्डकर विजेता संघ म्हणून 10 लाख डॉलर (साधारण 8.27 कोटी रुपये) मिळाले आहेत. तसेच उपविजेता ठरलेल्या दक्षिण अफ्रिकन महिला संघाला 5 लाख डॉलर (साधारण 4.15 कोटी रुपये) बक्षीस म्हणून मिळाले आहेत.

तसेच उपांत्य फेरीत पराभूत झालेल्या भारती आणि इंग्लंड महिला संघाला 2.10 लाख डॉलर (साधारण 1.74 कोटी रुपये) बक्षीस म्हणून मिळाले आहेत. त्याचबरोबर जे संघ साखळी फेरीतून बाहेर गेले, त्या संघांना 24.83 लाख रुपये मिळाले, त्याचबरोबर साखळी फेरीत प्रत्येक सामना जिंकण्यासाठी संघांना 14.48 लाख रुपये मिळाले.

दरम्यान, गेल्यावर्षी झालेल्या पुरुष टी20 वर्ल्डकप जिंकणाऱ्या इंग्लंड संघाला १३ कोटी रुपये मिळाले होते. तसेच उपविजेत्या पाकिस्तान संघाला 6.5 कोटी रुपये मिळाले होते. तसेच उपांत्य फेरीत पराभूत होणाऱ्या संघाला 3.25 कोटी रुपये मिळाले होते.

अंतिम सामन्यात ऑस्ट्रेलियन महिला संघाचा विजय

अंतिम सामन्यात प्रथम फलंदाजी करताना ऑस्ट्रेलियन महिला संघाने 20 षटकात 156 धावा उभारल्या. ऑस्ट्रेलियाकडून बेथ मूनीने 74 धावांची अर्धशतकी खेळी केली. दरम्यान, 157 धावांच्या आव्हानाचा पाठलाग करताना दक्षिण आफ्रिकेला लॉरा वोल्वार्डच्या 61 धावांच्या खेळीनंतरही 20 षटकात 6 बाद 137 धावाच करता आल्या.

दरम्यान, बेथ मूनीला या सामन्यासाठी सर्वोत्तम खेळाडूचा पुरस्कार मिळाला, तसेच ऍश्ले गार्डनरला स्पर्धेतील सर्वोत्तम खेळाडूचा पुरस्कार मिळाला.