Wiaan Mulder Six Video: दक्षिण आफ्रिकेचा संघ सध्या न्यूझीलंड दौऱ्यावर असून 5 सामन्यांच्या टी-20 मालिकेतील दुसरा सामना 17 मार्च रोजी हॅमिल्टन येथे खेळला गेला. या सामन्यात यजमान न्यूझीलंडने दक्षिण आफ्रिकेचा 68 धावांनी मोठा पराभव करत मालिकेत पुनरागमन केले. जरी दक्षिण आफ्रिकेला या सामन्यात पराभवाचा सामना करावा लागला असला, तरी त्यांच्या वियान मुल्डर या सलामीवीर फलंदाजाच्या एका जबरदस्त षटकाराची चर्चा सध्या जगभरात होत आहे. मुल्डरने मारलेला हा षटकार इतका लांब होता की चेंडू थेट स्टेडियमची सीमा ओलांडून बाहेरच्या रस्त्यावर जाऊन पडला, ज्याचा व्हिडिओ सोशल मीडियावर प्रचंड व्हायरल होत आहे.

सामन्याच्या सुरुवातीला न्यूझीलंडने पहिल्यांदा फलंदाजी करताना निर्धारित 20 षटकांत 6 बाद 176 धावा केल्या होत्या. या लक्ष्याचा पाठलाग करण्यासाठी मैदानात उतरलेल्या दक्षिण आफ्रिकेच्या सलामीवीरांनी सुरुवातीच्या दोन षटकांत अत्यंत सावध पवित्रा घेतला. पहिल्या दोन षटकांत आफ्रिकेला केवळ 5 धावाच काढता आल्या. मात्र, तिसऱ्या षटकात मुल्डरने आक्रमक रुप धारण करण्याचा निर्णय घेतला.

न्यूझीलंडचा वेगवान गोलंदाज काइल जेमिसन याच्या षटकातील दुसऱ्या चेंडूवर मुल्डरने किंचित पुढे सरसावत मिड-विकेटच्या दिशेने एक गगनभेदी पूल शॉट खेळला. हा षटकार तब्बल 100 मीटर लांब गेला. चेंडू स्टेडियमच्या छतावरुन थेट बाहेरच्या रस्त्यावर जाऊन पडला. हा शॉट पाहून मैदानातील खेळाडूंसह प्रेक्षकही अवाक झाले.

मुल्डरचा हा षटकार सामन्यातील आकर्षणाचा केंद्रबिंदू ठरला असला तरी, दक्षिण आफ्रिकेची फलंदाजी मात्र सपशेल अपयशी ठरली. 177 धावांच्या लक्ष्याचा पाठलाग करताना आफ्रिकेचा डाव अवघ्या 15.3 षटकांत 107 धावांवर गारद झाला. संघाकडून जॉर्ज लिंडे याने सर्वाधिक 33 धावांची खेळी खेळली, तर उर्वरित फलंदाजांनी निराशा केली. विशेष म्हणजे, आफ्रिकेचे सहा फलंदाज तर दुहेरी आकडाही गाठू शकले नाहीत. न्यूझीलंडच्या वतीने गोलंदाजीमध्ये लॉकी फर्ग्युसन आणि बेन सियर्स यांनी प्रत्येकी 3 बळी घेत आफ्रिकेच्या फलंदाजीचे कंबरडे मोडले. तसेच कर्णधार मिचेल सँटनरने 2, तर क्लो मेक्कोन्की आणि जेम्स नीशम यांनी प्रत्येकी 1 बळी घेतला.

या विजयासह न्यूझीलंडने (New Zealand) मालिकेत जोरदार पुनरागमन केले असून आता या मालिकेतील तिसरा टी-20 सामना ऑकलंडच्या ईडन पार्क मैदानावर खेळवला जाणार आहे. मालिकेचा पहिला सामना आफ्रिकेने एकतर्फी जिंकला होता, त्यामुळे आता ही मालिका 1-1 अशा बरोबरीत आली असून पुढील सामन्यात कोण बाजी मारणार, याकडे सर्वांचे लक्ष लागले आहे. सध्या तरी वियान मुल्डरचा तो 'रोड हिट' षटकार चाहत्यांसाठी चर्चेचा मुख्य विषय बनला आहे.