Why Jasprit Bumrah Not Playing India vs Australia 2nd ODI:

भारत विरुद्ध ऑस्ट्रेलिया संघात सध्या वनडे मालिका सुरू असून दुसरा सामना रविवारी (२४ सप्टेंबर) खेळला जात आहे. इंदूरमधील होळकर क्रिकेट स्टेडियमवर हा सामना होत आहे, पण या सामन्यासाठी भारताचा वेगवान गोलंदाज जसप्रीत बुमराह अनुपलब्ध आहे. यामागील कारणही बीसीसीआयने स्पष्ट केले आहे.

बीसीसीआयने दिलेल्या माहितीनुसार बुमराह इंदूरला होणाऱ्या दुसऱ्या वनडेपूर्वी त्याच्या घरी रवाना झाला आहे. त्याने संघव्यवस्थापनाकडून छोट्या सुट्टीसाठी मंजुरी मिळवली असून तो कुटुंबाला भेटण्यासाठी गेला आहे.

त्यामुळे वेगवान गोलंदाज मुकेश कुमार त्याचा बदली खेळाडू म्हणून दुसऱ्या वनडेसाठी भारतीय संघात सामील होईल. तसेच बुमराह २७ सप्टेंबर रोजी राजकोटला ऑस्ट्रेलिया विरुद्ध होणाऱ्या तिसऱ्या वनडेसाठी भारतीय संघात पुन्हा सामील होईल.

बुमराह आणि त्याची पत्नी संजना गणेशन यांना सप्टेंबरच्या सुरुवातीला पुत्ररत्नाची प्राप्ती झाली आहे. बुमराह मुलाच्या जन्मावेळीही दोन-तीन दिवसांची सुट्टी घेऊन घरी गेला होता.

त्याने त्यावेळी आशिया चषकातील नेपाळविरुद्धचा साखळी फेरीचा सामना खेळला नव्हता. पण तो सुपर फोर फेरीवेळी पुन्हा संघात सामील झाला आणि संघाच्या आशिया चषक विजयात मोलाचा वाटा उचलला होता.

दरम्यान, लक्षात घेण्यासारखी गोष्ट अशी की ऑस्ट्रेलियाविरुद्धच्या दुसऱ्या वनडेसाठी मुकेश कुमारला बुमराहचा बदली खेळाडू म्हणून संधी दिली असली, तरी त्याचा भारताच्या प्लेइंग इलेव्हनमध्ये समावेश करण्यात आलेला नाही.

दुसऱ्या वनडेसाठी प्लेइंग इलेव्हनमध्ये बुमराहच्या जागेवर प्रसिद्ध कृष्णाला खेळवण्यात आले आहे. या सामन्यासाठी प्लेइंग इलेव्हनमध्ये हा एकमेव बदल भारतीय संघात करण्यात आला आहे.

ऑस्ट्रेलियाविरुद्धच्या दुसऱ्या वनडे सामन्यासाठी अशी आहे भारताची प्लेइंग इलेव्हन -

शुभमन गिल, ऋतुराज गायकवाड, श्रेयस अय्यर, केएल राहुल (यष्टीरक्षक/कर्णधार), इशान किशन, सूर्यकुमार यादव, रवींद्र जडेजा, रविचंद्रन अश्विन, शार्दुल ठाकूर, मोहम्मद शमी, प्रसिद्ध कृष्णा