West Indies vs India, 1st Test, 2nd Day: भारत विरुद्ध वेस्ट इंडिज संघात बुधवारपासून दोन सामन्यांची कसोटी मालिका सुरू झाली असून पहिला सामना डॉमिनिकामधील रोसौ येथील विंडसर पार्क येथे खेळला जात आहे. या सामन्यात दुसऱ्या दिवसाखेरपर्यंत भारताने मजबूत पकड मिळवली आहे.

भारताने दुसऱ्या दिवसाखेर पहिल्या डावात 113 षटकात 2 बाद 312 धावा केल्या आहेत. त्यामुळे भारतीय संघ 162 धावांनी आघाडीवर आहे. भारताकडून दुसऱ्या दिवसाखेर सलामीवीर यशस्वी जयस्वाल 143 धावांवर आणि विराट कोहली 36 धावांवर नाबाद आहे.

दुसऱ्या दिवशी भारताने 24 व्या षटकापासून आणि बिनबाद 80 धावांपासून पुढे खेळायला सुरुवात केली. त्यावेळी यशस्वी जयस्वाल 40 धावांवर आणि कर्णधार रोहित शर्मा 30 धावांवर नाबाद होते. या दोघांनीही पहिल्या दिवसाप्रमाणेच दुसऱ्या दिवशीही शानदार खेळ केला. या दोघांनीही द्विशतकी भागीदारीही केली.

दरम्यान जयस्वालने पदार्पणाच्या डावातच शतक करण्याचा कारनामा केला. त्याने 215 चेंडूंमध्ये त्याचे शतक पूर्ण केले. त्याच्यानंतर लगेचच रोहितनेही चौकारासह 219 चेंडूत शतक पूर्ण केले. पण शतक पूर्ण झाल्यानंतर तो पुढच्याच चेंडूवर एलिक अथनाथविरुद्ध खेळताना जोशुआ दा सिल्वाकडे झेल देत बाद झाला.

त्याच्या विकेटवर वेस्ट इंडिजने रिव्ह्युची मागणी केली होती, ज्यात तो बाद असलेले दिसले. त्यामुळे रोहितला 221 चेंडूत 103 धावा करून माघारी परतावे लागले.

त्याच्यानंतर फलंदाजीला आलेला शुभमन गिल या डावात खास काही करू शकला नाही. त्याला ६ धावांवर जोमेल वॉरिकनने बाद केले. पण त्यानंतर विराट कोहलीने जयस्वालला चांगली साथ दिली. या दोघांनीही नंतर आणखी पडझड होऊ दिली नाही.

दरम्यान, विराटने संयमी खेळताना तब्बल 80 चेंडूंनंतर पहिली बाउंड्री मारली. या दोघांनी दुसऱ्या दिवसाखेर 72 धावांची नाबाद भागीदारी केली आहे. आता जयस्वालला पहिल्याच डावात द्विशतक करण्याची संधी असणार आहे.

तत्पुर्वी, वेस्ट इंडिजचा पहिला डाव 64.3 षटकात 150 धावांवर संपुष्टात आला होता.