Volleyball World Beach Pro Tour 2023: जागतिक बीच व्हॉलिबॉल प्रो-टूर स्पर्धेचे यजमानपद गोव्याला बहाल करण्यात आले असून राज्यात आणि देशातही ही स्पर्धा प्रथमच खेळली जाईल.

मांद्रेचे आमदार जीत आरोलकर यांची स्पर्धेच्या आयोजन समिती अध्यक्षपदी निवड करण्यात आली आहे.

आमदार आरोलकर माजी व्हॉलिबॉलपटू आहेत. नियोजित वेळापत्रकानुसार जागतिक बीच व्हॉलिबॉल प्रो-टूर स्पर्धा 19 ते 22 ऑक्टोबर या कालावधीत होईल. स्पर्धा दक्षिण गोव्यातील वार्का येथील समुद्रकिनारी होईल, अशी माहिती आमदार आरोलकर यांनी दिली.

व्हॉलिबॉल वर्ल्ड यांनी या स्पर्धेचे गोव्याला यजमानपद बहाल केले आहे. स्पर्धेत जगभरातील विविध देशातील संघ भाग घेतील. चेन्नईस्थित मरिना बीच स्पोर्टस क्लब गोव्यातील जागतिक स्पर्धेचे आयोजक आहेत.

पुढील वर्षी पॅरिसमध्ये होणाऱ्या ऑलिंपिक स्पर्धेच्या पार्श्वभूमीवर जागतिक बीच व्हॉलिबॉल प्रो-टूर स्पर्धा महत्त्वपूर्ण मानली जाते.