Virat Kohli Stunning Catch Slips IND vs NZ 2026: भारत-न्यूझीलंड यांच्यात पाच सामन्यांच्या वनडे मालिकेतील पहिला सामना ऑकलंडच्या ईडन पार्क मैदानावर खेळला जात आहे. या सामन्यात भारतीय संघाचा कर्णधार शुभमन गिलने नाणेफेक जिंकून पहिल्यांदा गोलंदाजी करण्याचा घेतलेला निर्णय भारतीय गोलंदाजांनी अगदी तंतोतंत खरा ठरवला आणि किवी संघाचा डाव अवघ्या 185 धावात संपुष्टात आणला. या सामन्यात भारतीय संघाची गोलंदाजी जितकी शिस्तबद्ध होती, तितकीच क्षेत्ररक्षणामध्येही खेळाडूंनी कमाल दाखवली.

दरम्यान, विराट कोहलीने (Virat Kohli) स्लिपमध्ये घेतलेल्या अफलातून झेलने साऱ्यांचेच डोळे दिवपून टाकले. सामन्याच्या 29व्या षटकात अंशुल कंबोजच्या गोलंदाजीवर नेथन स्मिथने खेळलेला चेंडू बॅकवर्ड स्लिपच्या दिशेने वेगाने जात असतानाच विराटने हवेत झेप घेत अफलातून झेल घेतला.

तिसऱ्या पंचांनी रिप्ले तपासल्यानंतर हा झेल पूर्णपणे अचूक असल्याचे स्पष्ट झाले. या शानदार झेलच्या जोरावर विराटने भारताचा माजी कर्णधार महेंद्रसिंग धोनीचा एक मोठा विक्रम मोडीत काढला. न्यूझीलंडच्या भूमीवर वनडे क्रिकेटमध्ये झेल टिपणारा विराट कोहली आता सर्वात ज्येष्ठ भारतीय खेळाडू बनला. याआधी हा विक्रम धोनीच्या नावावर होता, ज्याने 37 वर्षे 218 दिवसांच्या वयात न्यूझीलंडमध्ये हा पराक्रम केला होता, तर विराटने 37 वर्षे 364 दिवसांच्या वयात ही कामगिरी करुन स्वतःचे नाव सुवर्णअक्षरांनी कोरले.

या सामन्यात कर्णधार शुभमनचा चार वेगवान गोलंदाजांसह उतरण्याचा निर्णय पूर्णपणे यशस्वी ठरला. युवा वेगवान गोलंदाज अर्शदीप सिंहने आपल्या अचूक माऱ्याच्या जोरावर 10 षटकांत तब्बल 4 बळी टिपले, तर गुरनूर ब्रारने 3 महत्त्वपूर्ण गडी बाद केले. याशिवाय, अंशुल कंबोजने 2 विकेट्स घेत मोलाची साथ दिली, जरी आकिब नबीला विकेट मिळाली नसली तरी त्याने नवीन चेंडूने किवी फलंदाजांना बेजार केले. या शिस्तबद्ध गोलंदाजी आणि अप्रतिम क्षेत्ररक्षणाच्या जोरावर भारताने मालिकेत विजयासाठी भक्कम पाया रचला.