India vs Sri Lanka: भारत विरुद्ध श्रीलंका संघात झालेल्या वनडे मालिकेतील तिसरा सामना तिरुअनंतपुरममधील ग्रीनफिल्ड आंतरराष्ट्रीय स्टेडियमवर झाला. या सामन्यात भारताने 317 धावांनी विजय मिळवला. या विजयासह भारताने मालिकाही 3-0 अशी जिंकली. भारताच्या या विजयात विराट कोहलीचे योगदान महत्त्वाचे राहिले.

विराटने या सामन्यात दीडशतकी खेळी करताना चौकार-षटकारांचाही पाऊस पाडला. या खेळीदरम्यान त्याने एक 97 मीटरचा षटकार मारला होता. त्याच्या या षटकाराची बरीच चर्चा होत आहे. कारण त्याने हा षटकार मारताना माजी कर्णधार एमएस धोनीप्रमाणे हेलिकॉप्टर शॉट खेळला.

विराटने या सामन्यात त्याचे शतक 85 चेंडूतच पूर्ण केले होते. शतक पूर्ण झाल्यानंतर त्याने तब्बल 7 षटकार ठोकले. त्याने 100 ते 150 धावांपर्यंत पोहोचायला केवळ 21 चेंडू घेतले. त्याने शतक केल्यानंतर 44 व्या षटकात श्रीलंकेचा गोलंदाज कसून रजिताने टाकलेल्या स्लोअर बॉलवर हेलिकॉप्टर शॉट खेळत लाँग-ऑनच्या स्टँडमध्ये चेंडू पाठवला.

त्याचा हा षटकार जळपास 97 मीटर पार करून गेला. हा शॉट मारल्यानंतर विराटही खूश दिसला. तसेच तो शॉट खेळल्यानंतर खेळपट्टीच्या दुसऱ्या बाजूला उभा असलेल्या श्रेयस अय्यरलाही भेटला. यावेळी तो श्रेयसला काहीतरी म्हणाला. पण तो त्यावेळी त्याच्या शॉटचे वर्णन माही शॉट असे करताना दिसतोय, असा कयास अनेक चाहत्यांनी लावला.

(Virat Kohli hit Dhoni-like helicopter shot for 97meter six)

दरम्यान, विराटने या सामन्यात 110 चेंडूत नाबाद 166 धावांची खेळी केली. या खेळीत त्याने एकूण 13 चौकार आणि 8 षटकार मारले. विराटची वनडेमध्ये 150 धावांचा टप्पा पार करण्याची ही पाचवी वेळ होती. तसेच हे त्याचे मायदेशातील 21 वे वनडे शतक होते. त्यामुळे तो मायदेशात सर्वाधिक वनडे शतके करणाराही फलंदाज ठरला आहे.

या सामन्यात विराटव्यतिरिक्त शुभमन गिलने देखील शतकी खेळी करताना 97 चेंडूत 116 धावांची खेळी केली. तसेच रोहित शर्माने 42 धावांची खेळी केली. त्यामुळे भारताने प्रथम फलंदाजी करताना 50 षटकांत 5 बाद 390 धावा केल्या होत्या. त्यानंतर 391 धावांचा पाठलाग करताना श्रीलंकेचा संघ 22 षटकात 73 धावांवरच सर्वबाद झाला.