Pondicherry Inter State T20 Matches:  पुदुचेरी येथे सुरू असलेल्या आंतरराज्य टी-20 क्रिकेट स्पर्धेत गोव्याचा संघ पुन्हा एकदा अडखळला. विदर्भ संघाची घसरगुंडी उडाली, मात्र आकाश कोम्बे याने नोंदविलेल्या आक्रमक अर्धशतकाच्या बळावर त्यांनी सामना तीन विकेट राखून जिंकला.

मोसमपूर्व सराव या उद्देशाने स्पर्धेत सहभागी झालेल्या गोव्याला स्पर्धेत सलग दुसरा पराभव पत्करावा लागला. गोलंदाजांनी सलग दुसऱ्या लढतीत निराशा केली.

१७९ धावांच्या आव्हानासमोर शुभम तारी व विजेश प्रभुदेसाई यांच्या प्रभावी गोलंदाजीसमोर विदर्भाची ६ बाद ११५ अशी घसरगुंडी उडाली होती.

मात्र नंतर आकाश याने आक्रमक फलंदाजी करत संघाला विजयाच्या दिशेने नेले. आकाशने मंदार महाले याच्यासमवेत सहाव्या विकेटसाठी ८३ धावांची भागीदारी केली.

जिंकण्यासाठी १७ चेंडूंत ३१ धावांची आवश्यकता असताना शुभमने आकाश याला बाद केले. त्यानंतर अक्षय कर्णेवार व दर्शन नळकांडे यांनी विदर्भाला शेवटच्या चेंडूवर विजय मिळवून दिला.

त्यापूर्वी, प्रथम फलंदाजीचे आमंत्रण मिळाल्यानंतर गोव्याने राहुल त्रिपाठी, कश्यप बखले व कर्णधार दर्शन मिसाळ यांच्या चमकदार फलंदाजीच्या बळावर ४ बाद १७८ धावा केल्या.

संक्षिप्त धावफलक

गोवा : २० षटकांत ४ बाद १७८ (स्नेहल कवठणकर ११, राहुल त्रिपाठी ३९- २४ चेंडू, ७ चौकार, कश्यप बखले ४५- ३३ चेंडू, ५ चौकार, १ षटकार, दीपराज गावकर २२, दर्शन मिसाळ नाबाद ४५- २७ चेंडू, ३ चौकार, ३ षटकार, तुनीष सावकार नाबाद ११, दर्शन नळकांडे २-३४)पराभूत

वि. विदर्भ : २० षटकांत ७ बाद १८२ (आकाश कोम्बे ७०- ४२ चेंडू, ४ चौकार, ५ षटकार, मंदार महाले २६, अक्षय कर्णेवार नाबाद ३४, दर्शन नळकांडे नाबाद २०, दर्शन मिसाळ ४-०-४७-१, हेरंब परब ४-०-४७-०, शुभम तारी ४-०-२४-३, विजेश प्रभुदेसाई ४-०-३३-३, विकास सिंग २-०-१५-०, दीपराज गावकर २-०-१५-०).