IPL 2026 चा थरार सध्या शिगेला पोहोचला आहे, पण राजस्थान रॉयल्सच्या चाहत्यांसाठी एक काळजाचा ठोका चुकवणारी बातमी समोर आली आहे. आपल्या धडाकेबाज फलंदाजीने अवघ्या १५ व्या वर्षी क्रिकेट विश्वाचे लक्ष वेधून घेणारा वैभव सूर्यवंशी गुजरात टायटन्स (GT) विरुद्धच्या सामन्यात दुखापतग्रस्त झाला आहे. भारताचा अनुभवी गोलंदाज मोहम्मद सिराजच्या एका भेदक यॉर्करमुळे वैभवला मैदानावरच असह्य वेदना सहन कराव्या लागल्या.

सिराजचा घातक चेंडू आणि वैभवची झुंज गुजरात टायटन्सविरुद्धच्या सामन्यात राजस्थान रॉयल्सने वैभव सूर्यवंशीचा 'इम्पॅक्ट प्लेयर' म्हणून वापर केला. डावाच्या पहिल्याच षटकात मोहम्मद सिराजने एक वेगवान आणि अचूक यॉर्कर टाकला, जो वैभवच्या पायाला थेट लागला. चेंडूचा वेग इतका प्रचंड होता की वैभवला सावरण्याची संधीच मिळाली नाही आणि तो मैदानातच कोसळला. तातडीने राजस्थान रॉयल्सच्या वैद्यकीय पथकाला मैदानावर पाचारण करण्यात आले.

दुखापत असतानाही ३६ धावांची फटकेबाजी वेदनेने ग्रासलेले असतानाही या युवा खेळाडूने हार मानली नाही. प्राथमिक उपचारानंतर त्याने फलंदाजी सुरू ठेवली आणि अवघ्या १६ चेंडूंमध्ये ३६ धावांची आक्रमक खेळी साकारली. जरी तो सिराजच्या बाऊन्सरवर मोठा शॉट खेळताना बाद झाला असला, तरी त्याच्या जिद्दीचे सोशल मीडियावर प्रचंड कौतुक होत आहे. मात्र, या घटनेनंतर तो संपूर्ण आयपीएल हंगामातून बाहेर पडणार की काय, अशी भीती चाहत्यांनी व्यक्त केली आहे.

दुखापत किती गंभीर आहे? राजस्थान रॉयल्सच्या चाहत्यांसाठी एक दिलासादायक माहिती समोर आली आहे. प्राथमिक माहितीनुसार, वैभवची दुखापत फारशी गंभीर नाही. सामन्यानंतर समोर आलेल्या एका व्हिडिओमध्ये वैभव कोणत्याही मदतीशिवाय अगदी सहज चालताना दिसत आहे. त्याच्या चेहऱ्यावर वेदनांचे कोणतेही चिन्ह नव्हते, त्यामुळे चाहत्यांनी सुटकेचा निःश्वास टाकला आहे.

पुढील सामन्यात खेळणार का? राजस्थान रॉयल्ससाठी प्ले-ऑफचा मार्ग आव्हानात्मक झाला आहे. त्यांना पुढील तीनपैकी किमान दोन सामने जिंकणे अनिवार्य आहे. अशा परिस्थितीत वैभवसारख्या स्फोटक फलंदाजाची संघाला गरज आहे. १७ मे रोजी दिल्ली कॅपिटल्सविरुद्ध होणाऱ्या महत्त्वाच्या सामन्यात वैभव सूर्यवंशी पुन्हा एकदा मैदानात उतरण्याची दाट शक्यता वर्तवली जात आहे.