देशात सध्या नवरात्रीची धुम आहे, सर्वत्र गरबा, दांडीयांचा जल्लोष सुरू आहे. कोरोना संसर्गाच्या पार्श्वभूमीवर घालण्यात आलेल्या बंधनानंतर मोठ्या थाटामाटात नवरात्र साजरी केली जात आहे. भारतीय संगीत, संस्कृतीची देशा-विदेशात क्रेझ आहे. ख्रिस गेल (Chris Gayle) सध्या भारतात असून, तो नवरात्रोत्सवाचा आनंद घेताना दिसत आहे.

ख्रिस गेल लिजंड लीग क्रिकेटसाठी सध्या भारतात आहे. गेल गुजरात जायंट्स संघाकडून खेळत आहे. पार्टी अॅनिमल अशी ओळख असलेल्या ख्रिस गेलला भारतीय गरब्याने चांगलीच भुरळ घातली असून, त्याने नवरात्रीच्या निमित्ताने जबरदस्त डान्स केला आहे. गेलच्या या डान्सचा व्हिडिओ सध्या सोशल मीडियावर व्हायरल होत आहे. क्रिकेट विश्वात धुमाकूळ घातलेल्या गेलने आता गरबा डान्स करत त्याच्या फॅन्सला सुखद धक्का दिला आहे.

गेलने गुजरात जायंट्स संघाच्या सहकारी खेळाडूंसोबत नवरात्रीचा सण साजरा केला. गुजरात जायंट्सच्या टीमने गेलच्या डान्सचा व्हिडिओ सोशल मीडियावर शेअर केलाय. "युनिव्हर्स बॉस ख्रिस गेल नवरात्रोत्सव साजरा करण्यासाठी ढोलच्या तालावर नाचत आहे." असे कॅप्शन या व्हिडिओला देण्यात आले आहे.

गेलसह भारतीय फंलदाज वीरेंद्र सेहवाग आणि गुजरात जायंट्सच्या इतर खेळाडूंनीही जोधपूरमध्ये नवरात्रीचा उत्सव साजरा केला. सर्व खेळाडूंनी पारंपरिक संगीतावर जबरा नृत्य केले. विशेष म्हणजे सर्व खेळाडूंनी पारंपरिक भारतीय पोषाख परिधान केले होते.