West Zone, Duleep Trophy 2023-24: भारतात सध्या दुलीप ट्रॉफी 2023-24 स्पर्धा सुरू आहे. विभागीय पद्धतीने होणाऱ्या या स्पर्धेत पश्चिम विभागाचा (West Zone) सामना 5 जुलैपासून मध्य विभागाविरुद्ध होणार आहे. हा सामना बंगळुरूमधील अलुर क्रिकेट स्टेडियमवर होणार आहे.
या स्पर्धेसाठी पश्चिम विभागात मुंबईचा वेगवान गोलंदाज तुषार देशपांडेला संधी मिळाली आहे. त्याला चेतन साकारियाच्या जागेवर संधी देण्यात आली आहे. साकारिया दुखापतग्रस्त झाला असल्याने त्याला या स्पर्धेतून बाहेर जावे लागले आहे.
देशपांडे आयपीएल 2023 मध्ये एमएस धोनीच्या नेतृत्वातील चेन्नई सुपर किंग्सकडून खेळला होता. या हंगामात त्याने शानदार कामगिरी केली होती. तो आयपीएल 2023 मध्ये विजेतेपद जिंकलेल्या चेन्नई सुपर किंग्सकडून सर्वाधिक विकेट्स घेणारा गोलंदाज होता. त्याने 16 सामन्यांमध्ये 21 विकेट्स घेतल्या होत्या.
देशपांडेने त्याच्या यशाचे श्रेय धोनीला दिले आहे. त्याने इंडियन एक्सप्रेसशी बोलताना सांगितले की 'एकदा मी चांगली गोलंदाजी केली नाही, तेव्हा त्याने मला सांगितले की काळजी करू नकोस. चिंता न करता प्रक्रियेवर लक्ष दे. एकदा प्रेझेंटेशनवेळी त्याने सांगितले होते की नवीन इम्पॅक्ट प्लेअरच्या नियमामुळे २०० पेक्षा जास्त धावा निघणे सामन्य असेल. तो खेळाडूंमध्ये सुरक्षेची भावना निर्माण करतो, ज्याची युवा खेळाडूंना अपेक्षा असते.'
तसेच तुषार म्हणाला, 'धोनीच्या योजना स्पष्ट असते की हे करायचे आहे आणि ती नंतर अमंलात आणायची आहे. तो स्वातंत्र्यही देतो आणि गरज पडल्यास सांगतोही. त्याने मला सांगितले की वरिष्ठ स्तरावर खेळण्यासाठी माझ्याकडे सर्वकाही आहे, फक्त शांत राहा, दीर्घ श्वास घे. मनाला शांत ठेवणे महत्त्वाचे आहे.'
देशपांडेने त्याच्या कारकिर्दीत 29 प्रथम श्रेणी सामने खेळले असून 80 विकेट्स घेतल्या आहेत. तसेच त्याने 34 लिस्ट ए सामने खेळले असून 35 विकेट्स घेतल्या आहेत. याशिवाय त्याने 59 टी20 सामने खेळले असून 83 विकेट्स घेतल्या आहेत.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.