पणजी: तेजस्विनी दुर्गड हिचे धडाकेबाज अर्धशतक, तसेच सलामीची श्रेया परब आणि कर्णधार शिखा पांडे यांच्या प्रभावी फलंदाजीच्या बळावर रविवारी गोव्याच्या सीनियर महिला क्रिकेट संघाने दणदणीत विजय सलामी दिली. एकदिवसीय क्रिकेट स्पर्धेतील एलिट ड गट लढतीत त्यांनी विदर्भास सात विकेट आणि अकरा चेंडू राखून सहज हरविले. सामना विशाखापट्टणम येथील कंडुकुरी क्रिकेट अकादमी मैदानावर झाला.

धावबाद होण्यापूर्वी तेजस्विनीने 74 चेंडूंत सात चौकारांच्या मदतीने 50 धावा केल्या. संघाला(team) विजयाच्या दिशेने नेताना तेजस्विनीने श्रेया परब हिच्यासमवेत दुसऱ्या विकेटसाठी 47 धावांची, तर नंतर शिखा हिच्यासमवेत तिसऱ्या विकेटसाठी 52 धावांची भागीदारी केली. विजयासाठी 17 धावा हव्या असताना तेजस्विनी बाद झाली. नंतर शिखाने संजुला नाईकसमवेत विजयी औपचारिकता पूर्ण केली. संजुलाने विजयी चौकार लगावला.

श्रेयाने 102 चेंडूंत तीन चौकारांच्या मदतीने 37 धावा केल्या, तर शिखाने 50 चेंडूंत दोन चौकारांच्या मदतीने 33 धावा केल्या. 154 धावांचे आव्हान स्वीकारलेल्या गोव्यास श्रेया व पूर्वजा वेर्लेकर (23) यांनी 38 धावांची सलामी दिली. गोव्याचा स्पर्धेतील (competition) पुढील सामना सोमवारी हरियानाविरुद्ध विझियानगरम येथे होईल.

त्यापूर्वी, विदर्भाच्या तळाच्या फलंदाजांनी खिंड लढविल्यामुळे त्यांना 6 बाद 79 वरून सर्वबाद 153 धावांची मजल मारता आली. विदर्भाने नाणेफेक जिंकून प्रथम फलंदाजी (Batting) स्वीकारली होती. गोव्यातर्फे निकिता मळीक, पूर्वा भाईडकर यांनी प्रत्येकी दोन विकेट मिळविल्या.