अफगाणिस्तान (Afghanistan) संघ पुढील वर्षी भारत (India) दौऱ्यावर येणार आहे. भारत आणि अफगाणिस्तान यांच्यात मर्यादित षटकांची मालिका खेळवण्यात येणार आहे. पुढील वर्षी मार्चमध्ये भारत आणि अफगाणिस्तान यांच्यात तीन सामन्यांची वनडे मालिका (ODI Series) होणार असल्याचे मानले जात आहे. अफगाणिस्तान क्रिकेट बोर्डाने (ACB) सोमवारी जाहीर केले की, अफगाणिस्तान संघ मार्चमध्ये भारताचा दौरा करेल आणि मर्यादित षटकांची मालिका खेळेल.

दरम्यान, फ्युचर टूर प्रोग्राम (FTP) अंतर्गत, अफगाणिस्तान 2022-23 मध्ये 11 वनडे इंटरनेशनल, चार T20 इंटरनेशनल आणि दोन कसोटी सामन्यांची मालिका खेळणार आहे. भारताविरुद्धच्या मालिकेशिवाय अफगाणिस्तान 2022 मध्ये नेदरलँड, झिम्बाब्वे, ऑस्ट्रेलिया आणि आयर्लंडविरुद्धही मालिका खेळणार आहे. T20 विश्वचषक 2021 (T20 World Cup) मध्ये भारत आणि अफगाणिस्तान यांच्यात शेवटचा सामना खेळला गेला होता, जो भारताने 66 धावांनी जिंकला होता.

तसेच, तालिबान आता अफगाणिस्तानमध्ये सत्तेवर असून अद्याप तालिबानने अफगाणिस्तानच्या महिला संघाला क्रिकेट खेळण्याची परवानगी दिलेली नाही. अशा परिस्थितीत आंतरराष्ट्रीय क्रिकेट परिषद (ICC) अफगाणिस्तानकडून पूर्ण क्रिकेट राष्ट्रचा दर्जा काढून घेऊ शकते. याशिवाय, तालिबान राजवटपासून अफगाणिस्तानने कोणतीही द्विपक्षीय मालिका खेळलेली नाही. अफगाणिस्तानमध्ये महिला क्रिकेटला परवानगी नसल्यामुळे ऑस्ट्रेलियानेही अफगाणिस्तान संघाला त्यांच्या देशात आमंत्रित करण्यास स्पष्टपणे नकार दिला होता.

याशिवाय, भारताबद्दल बोलायचे झाले तर, विराट कोहलीच्या (Virat Kohli) नेतृत्वाखालील टीम इंडियाला दक्षिण आफ्रिकेविरुद्धच्या (South Africa) तीन सामन्यांच्या कसोटी मालिकेत खेळायची आहे. यानंतर संघाला रोहित शर्माच्या (Rohit Sharma) नेतृत्वाखाली दक्षिण आफ्रिका दौऱ्यावर तीन सामन्यांची वनडे मालिका खेळायची आहे. दक्षिण आफ्रिका दौऱ्यानंतर भारतीय संघ मायदेशी परतेल आणि आयपीएल 2022 पूर्वी अनेक द्विपक्षीय मालिकांमध्ये भाग घेईल. वेस्ट इंडिज संघालाही भारत दौऱ्यावर जावे लागणार आहे.