Team India: भारतीय क्रिकेट संघ सध्या न्यूझीलंड दौऱ्यावर आहे. या दौऱ्यातील टी20 मालिका पूर्ण झाली असून आता वनडे मालिकेला शुक्रवारी सुरुवात होईल. पण, त्यापूर्वी भारतीय क्रिकेटपटूंनी त्यांच्या खास चाहत्याचा दिवस खास बनवला आहे.

गुरुवारी भारतीय संघातील काही खेळाडू ऑकलंडमध्ये त्यांच्या एका दिव्यांग चाहत्याला भेटले. या चाहत्याचे नाव दिव्यांश आहे. शिखर धवन, वॉशिंग्टन सुंदर, श्रेयस अय्यर, ऋषभ पंत, शार्दुल ठाकूर, दीपक चाहर, उमरान मलिक अशा काही खेळाडूंनी दिव्यांशबरोबर फोटोही काढले.

भारतीय संघ (Team India) दिव्यांशला भेटल्याचा व्हिडिओ बीसीसीआयने सोशल मीडियावर शेअर केला आहे. या व्हिडिओच्या कॅप्शनमध्ये बीसीसीआयने लिहिले आहे की ''वनडे मालिकेच्या आधी ऑकलंडमध्ये संस्मरणीय संवादानंतर भारतीय संघाचा 'सुपर फॅन' दिव्यांशसाठी आनंदाचा क्षण."

दरम्यान, भारताचा न्यूझीलंडविरुद्धचा (India vs New Zealand) पहिला वनडे सामना ऑकलंडमधील इडन पार्कमध्ये शुक्रवारी पार पडणार आहे. त्यानंतर 27 नोव्हेंबरला दुसरा आणि 30 नोव्हेंबरला तिसरा वनडे सामना अनुक्रमे हेमिल्टन आणि ख्राईस्टचर्च येथे होणार आहे. हे तिन्ही सामने भारतीय प्रमाणवेळेनुसार सकाळी 7:00 वाजता सुरू होतील.

यापूर्वी भारतीय संघाने हार्दिक पंड्याच्या नेतृत्वाखाली 3 सामन्यांच्या टी20 मालिकेत 1-0 अशा फरकाने विजय मिळवला आहे. आता वनडे मालिका शिखर धवनच्या नेतृत्वाखाली खेळली जाणार आहे. या न्यूझीलंड दौऱ्यासाठी बीसीसीआयने विराट कोहली, रोहित शर्मा सारख्या प्रमुख खेळाडूंना विश्रांती दिली होती. त्यामुळे या दौऱ्यासाठी अनेक युवा खेळाडूंना संघात संधी मिळाली आहे.

वनडे मालिकेसाठीचा पूर्ण भारतीय संघ:

शिखर धवन (कर्णधार), शुभमन गिल, श्रेयस अय्यर, सूर्यकुमार यादव, संजू सॅमसन (यष्टीरक्षक), दीपक हुडा, वॉशिंग्टन सुंदर, शार्दुल ठाकूर, दीपक चाहर, उमरान मलिक, अर्शदीप सिंग, युझवेंद्र चहल, कुलदीप यादव, ऋषभ पंत