टी-20 विश्वचषकात (T20 World Cup) टीम इंडियाचा (Team India) पाकिस्तानविरुद्धचा (Pakistan) दारुण पराभव झाल्यानंतर चाहत्यांमध्ये निराशा आणि राग आहे. त्यातूनच त्यांनी वेगवान गोलंदाज मोहम्मद शमीला (Mohammed Shami) आपल्या रागाचा शिकार बनवला आणि सोशल मीडियावर त्याला देशद्रोही, अशा शिव्या द्यायला सुरुवात केली. यानंतर भारताचा दिग्गज खेळाडू सचिन तेंडुलकरसह (Sachin Tendulkar) अनेक दिग्गज शमीच्या समर्थनार्थ पुढे आले आणि त्यांनी अशा भोंदूबाबांना चोख प्रत्युत्तर दिले आहे. आता फेसबुकनेही (Facebook) शमीविरोधात असभ्य शब्द वापरणाऱ्यांवर कारवाई केली आणि त्यांच्या कमेंट डिलीट केल्या आहेत.

फेसबुकच्या प्रवक्त्याने सांगितले की, भारतीय क्रिकेटपटूवर केलेल्या चुकीच्या आणि अपमानास्पद कमेंट्स काढून टाकण्यासाठी त्यांनी तत्काळ कारवाई सुरू केली आहे. समाजात उपद्रव निर्माण करणाऱ्या आणि सामुदायिक नियमांचे उल्लंघन करणाऱ्यांवर आम्ही कारवाई करणार. आम्ही अलीकडेच छळ आणि गुंडगिरी यांसारख्या क्रियाकलापांवर नवीन धोरण देखील जारी केले आहे. त्या अंतर्गत लोकांचा डेटा सुरक्षित ठेवला जातो.

या सामन्यात शमी ठरला महागडा

पाकिस्तान विरुद्ध T20 सामन्यात भारताने 7 बाद 151 धावा केल्या होत्या, पण पाकिस्तानने 17.5 षटकात बिनबाद 152 धावा करत एकतर्फी विजय नोंदवला. यामध्ये वेगवान गोलंदाज मोहम्मद शमी चांगलाच महागात पडला. त्याने 3.5 षटकात 43 धावा दिल्या त्याबदल्यात त्याला एकही विकेट मिळाली नाही. मात्र, टीम इंडियाचे बहुतांश गोलंदाज महागडे ठरले आणि कुणालाही विकेट मिळाली नाही. असे असतानाही शमीला लोकांच्या रोषाला बळी पडावे लागले.

वीरेंद्र सेहवागही शमीच्या समर्थनार्थ पुढे आला. सेहवागने ट्विट केले की, मोहम्मद शमीवर झालेला ऑनलाइन हल्ला धक्कादायक असून आम्ही त्याच्या पाठीशी उभे आहोत. तो चॅम्पियन आहे आणि जो कोणी भारताची टोपी घालतो त्याच्या हृदयात भारतच असतो. शमी आम्ही तुझ्यासोबत आहोत, पुढच्या सामन्यात तू तुझा क्लास दाखवून देशील अशी आम्हाला खात्री आहे.