अहमदाबाद: लाखभर प्रेक्षकांना शांत झालेले पहायचेय, असे तीन वर्षांपूर्वी ऑस्ट्रेलियाचा कर्णधार पॅट कमिंस म्हणाला होता. आता तीच री न्यूझीलंड कर्णधार मिचेल सँटनरनेही ओढलीय... यावर भारतीय कर्णधार सूर्यकुमारने हसत हसत प्रत्युत्तर दिले... आता काहीतरी नवे बोला!

टी-२० विश्वकरंडक स्पर्धेत उद्या होणाऱ्या अंतिम सामन्याच्या पूर्वसंध्येला पत्रकार परिषदेत सूर्यकुमार मोकळेपणाने आणि खुलून बोलला. फॉर्म नसलेल्या अभिषेक शर्मा आणि वरुण चक्रवर्तीची पाठराखणही केली.

कोणतीही खेळपट्टी असू दे!

उद्याच्या सामन्यासाठी तयार करण्यात आलेल्या खेळपट्टीचा मुद्दा गाजतोय, लाल की काळ्या मातीची किंवा मिश्र मातीची खेळपट्टी तयार केली आहे, या प्रश्नावर सूर्यकुमार म्हणतो, आम्ही लाल किंवा काळ्या मातीच्या खेळपट्ट्यांवर खेळलो आहोत, त्यामुळे समोर असेल त्यावर खेळण्यास सज्ज आहोत.

येथे कोणी मोठा भाऊ नाही

भारतीय संघातील वातावरणाबाबत बोलताना सूर्यकुमार म्हणाला, संघातील प्रत्येक खेळाडूचे व्यक्तिमत्त्व वेगवेगळे आहे. येथे मोठा भाऊ किंवा वडील बनून त्यांना समजवण्याचा प्रयत्न करत नाही. त्यांना मोकळे सोडले तर कामगिरी अधिक खुलून होते म्हणून मीही जबरदस्ती करत नाही; मात्र परिस्थिती हाताबाहेरही जाऊ देत नाही.