मुंबई: भारतीय क्रिकेट संघाचा 'गब्बर' म्हणजेच शिखर धवन याने आयुष्याची नवीन इनिंग सुरू केली आहे. आयशा मुखर्जीसोबतच्या घटस्फोटानंतर शिखरने सोफी शाइन हिच्याशी दुसऱ्यांदा विवाह केला असून, या शाही विवाह सोहळ्याचे फोटो सध्या सोशल मीडियावर तुफान व्हायरल होत आहेत. या खास क्षणी शिखरला आशीर्वाद देण्यासाठी भारतीय क्रिकेट विश्वातील अनेक आजी-माजी दिग्गज खेळाडूंनी हजेरी लावली होती.

रोहित-रितिकाची उपस्थिती

शिखर धवनच्या या आनंदाच्या क्षणी त्याचा जुना जोडीदार आणि भारतीय संघाचा कर्णधार रोहित शर्मा आपल्या पत्नीसह, रितिका सजदेहसोबत पोहोचला होता. या दोघांचे फोटो चाहत्यांच्या पसंतीस उतरत आहेत. रोहितसोबतच भारताचा माजी वेगवान गोलंदाज आणि सध्याचे निवडकर्ते आरपी सिंह यांनीही लग्नाला हजेरी लावून नवविवाहित दांपत्याला शुभेच्छा दिल्या. मैदानावरील रोहित-शिखरची जोडी पुन्हा एकदा ऑफ-फिल्ड एकत्र दिसल्याने चाहत्यांना जुन्या आठवणी ताज्या झाल्या.

सुरेश रैना, इरफान पठाण आणि चहलचा जलवा

'मिस्टर आयपीएल' म्हणून ओळखला जाणारा सुरेश रैना आपली पत्नी प्रियंका चौधरीसह या सोहळ्यात सहभागी झाला होता. त्यांच्याशिवाय भारताचा माजी अष्टपैलू खेळाडू इरफान पठाण आणि फिरकीपटू युझवेंद्र चहल यांनीही लग्नात हजेरी लावून कार्यक्रमाची शोभा वाढवली. शिखरच्या कप्तानीखाली पंजाब किंग्ससाठी चमकदार कामगिरी करणारा युवा खेळाडू आशुतोष शर्मा हा देखील आपल्या लाडक्या कर्णधाराच्या लग्नात आवर्जून उपस्थित होता.

बीसीसीआयचे उपाध्यक्ष आणि इतर मान्यवर

केवळ क्रिकेटपटूच नव्हे, तर बीसीसीआयचे उपाध्यक्ष राजीव शुक्ला यांनीही या विवाहात शिरकत केली. त्यांनी शिखर आणि सोफीला शुभेच्छा देतानाचे फोटो सोशल मीडियावर पोस्ट करून या विवाह सोहळ्याची अधिकृत माहिती दिली. या व्यतिरिक्त क्रिकेट आणि मनोरंजन विश्वातील इतरही अनेक मान्यवरांनी या सोहळ्याला हजेरी लावली होती. शिखर आणि सोफीचे पारंपारिक वेशभूषेतील फोटो पाहून सोशल मीडियावर त्यांच्यावर शुभेच्छांचा वर्षाव होत आहे.