पणजी: कसोटीपटू शिखा पांडे (Shikha Pandey) आणि संजुला नाईक (Sanjula Naik) या गोव्याच्या महिला क्रिकेट संघातील (Goa women's cricket team) सहकारी, मात्र शनिवारी सीनियर महिला चॅलेंजर एकदिवसीय क्रिकेट सामन्यांच्या स्पर्धेत दोघी प्रतिस्पर्धी ठरल्या. शिखाने संजुलास बाद करून योगायोग साधला. चॅलेंजर स्पर्धेस शनिवारपासून आंध्र प्रदेशमधील (Andhra Pradesh) विजयवाडा येथे सुरवात झाली. शिखा या स्पर्धेत भारत क संघाचे नेतृत्व करत आहे, तर संजुला भारत ड संघाची सदस्य आहे. पूजा वस्त्रकार हिच्या नेतृत्वाखालील ड संघाने शिखाच्या संघावर 40 धावांनी विजय मिळविला. ड संघाने प्रथम फलंदाजी करताना 8 बाद 251 धावा केल्या. त्यावेळी शिखा व संजुला आमनेसामने आल्या. संजुलाने 41 चेंडूंत तीन चौकारांच्या मदतीने 19 धावा केल्या.

शिखाच्या गोलंदाजीवर धारा गुज्जर हिच्या हाती झेल देऊन संजुला बाद झाली. शिखाने डावातील 10 षटकांत 48 धावा देत 2 विकेट मिळविल्या. नंतर तिच्या नेतृत्वाखालील संघाचा डाव 211 धावांत आटोपला. फलंदाजीत शिखाला फक्त तीन धावाच करता आल्या.