Saurashtra vs Maharashtra: विजय हजारे ट्रॉफीसाठी झालेल्या महाराष्ट्र विरूद्ध सौराष्ट्र या अंतिम सामन्यात तब्बल 14 वर्षांचा विजेतेपदाचा दुष्काळ बाजूला सारत सौराष्ट्र संघाने बाजी मारली. महाराष्ट्राने निर्धारित 50 षटकांत नऊ विकेट गमावून 248 धावा केल्या होत्या. प्रत्युत्तरात सौराष्टने हे लक्ष्य 46.3 षटकात पाच गड्यांच्या मोबदल्यात पुर्ण केले.

(Vijay Hazare Trophy Final)

या आधी सौराष्ट्रचा संघ 2007-08 च्या हंगामात चॅम्पियन ठरला होता. महाराष्ट्राचा कर्णधार ऋतुराज गायकवाड याच्या कॅप्टन इनिंग्जवर सौराष्ट्रच्या शेल्डन जॅक्सनची खेळी भारी पडली. ऋतुराजने 108 धावांची खेळी केली तर शेल्डनने 136 चेंडुत 133 धावा केल्या. या स्पर्धेत सौराष्ट्रच्या वेगवान गोलंदाजांचा तर महाराष्ट्राच्या फलंदाजांचा दबदबा राहिला.

सौराष्ट्रचा कर्णधार जयदेव उनाडकटने नाणेफेक जिंकून गोलंदाजीची निर्णय घेतला होता. महाराष्ट्राची सुरवात खराब झाली. पवन शाह चार धावांवर तर सत्यजीत बच्छाव सत्तावीस धावांवर बाद झाले. अंकित बावने देखील 16 धावा करून परतला. त्यानंतर कर्णधार ऋतुराज गायकवाडने 131 चेंडूत सात चौकार आणि चार षटकार ठोकत 108 धावा केल्या. या स्पर्धेतील ऋतुराजचे हे सलग तिसरे शतक आहे. यापुर्वी त्याने उत्तरप्रदेशविरोधात नाबाद 220 तर आसाम विरोधात 168 धावा केल्या होत्या. तसेच रेल्वेज विरोधात त्याने नाबाद 124 धावा केल्या होत्या.

249 धावांच्या लक्ष्याचा पाठलाग करताना सौराष्ट्रच्या शेल्डन जॅक्सनने हार्विक देसाईसोबत पहिल्या विकेटसाठी 125 धावांची भागीदारी केली. हार्विकने अर्धशतकी खेळी केली. शेल्डनने नाबाद 133 धावा सौराष्ट्रला विजय मिळवून दिला. सौराष्ट्रचा कर्णधार जयदेव उनाडकट याने या स्पर्धेत 19 विकेट घेतल्या आहेत.