गोव्याच्या डॉ. सतीश कुडचडकर याने 45व्या इंडियन मास्टर्स (व्हेटरन्स) राष्ट्रीय बॅडमिंटन स्पर्धेत 75+ वयोगटात पुरुष दुहेरीचे ब्राँझपदक मिळविले. कुडचडकर व सहकारी कर्नाटकचा एम. डी. मुरली जोडीचे आव्हान शनिवारी उपांत्य फेरीत संपुष्टात आले.

स्पर्धा नावेली येथील मनोहर पर्रीकर इनडोअर स्टेडियममध्ये सुरू आहे. कुडचडकर व मुरली जोडीवर उत्तराखंडच्या विद्याभूषण अरोरा व मोहन श्रीवास्तव जोडीने 21-15, 21-19 असा विजय नोंदविला. पुरुष दुहेरीत ब्राँझपदकावर समाधान मानावे लागले, तरी सतीश कुडचडकरला आणखी दोन पदकांची संधी आहे.

75+ वयोगटात पुरुष एकेरीची अंतिम फेरी गाठताना कुडचडकरने राजस्थानच्या रतनलाल मारु याला 21-16, 21-7 असे हरविले. मिश्र दुहेरीतही अंतिम फेरी गाठताना कुडचडकर व कर्नाटकच्या गौरम्मा वीरलिंग जोडीने राजस्थानच्या भूपालसिंग चावत व माया चावत जोडीला 21-11, 21-7 असे नमविले.

महिलांच्या 55+ वयोगटातील दुहेरीत गोव्याचे पदक निश्चित आहे. डॉ. मंजू खांडेपारकर हिने तमिळनाडूच्या सुनिता स्वामिनाथन हिच्या साथीत उपांत्य फेरीत गाठली. त्यांनी स्वाती रेगे (छत्तीसगड) व सुकेशा सग्गी (उत्तर प्रदेश) जोडीला उपांत्यपूर्व लढतीत 21-11, 21-10असे हरविले.