इंग्लंडविरुद्धच्या बाद फेरीच्या अत्यंत महत्त्वाच्या सामन्यात भारतीय फलंदाजांनी धावांचा पाऊस पाडत क्रिकेट विश्वाचे लक्ष वेधून घेतले आहे. या सामन्यात सर्वांत जास्त चमकला तो म्हणजे संजू सॅमसन. सुरुवातीपासूनच आक्रमक पवित्र्यात असलेल्या संजूने इंग्लिश गोलंदाजांना मैदानावर चोहोबाजूंनी चोपले. केवळ ४२ चेंडूंमध्ये ८९ धावांची खेळी करत त्याने भारताला मजबूत स्थितीत आणून ठेवले. त्याच्या या खेळीत ८ चौकार आणि ७ उत्तुंग षटकारांचा समावेश होता, ज्यामुळे त्याचा स्ट्राईक रेट २११ च्या घरात पोहोचला होता.

विराट कोहलीच्या 'त्या' ऐतिहासिक खेळीची पुनरावृत्ती

संजू सॅमसनने या धडाकेबाज कामगिरीसह भारताचा दिग्गज फलंदाज विराट कोहली याच्या एका मोठ्या विक्रमाची बरोबरी केली आहे. टी-२० विश्वचषकाच्या बाद फेरीतील सामन्यात सर्वोच्च वैयक्तिक धावसंख्या करण्याचा मान आता विराटसोबत संजूलाही मिळाला आहे.

विराटने २०१६ च्या उपांत्य फेरीत ८९ धावांची खेळी केली होती. आज संजूने नेमक्या तेवढ्याच धावा करून इतिहास रचला. विशेष म्हणजे संजूचा धावा करण्याचा वेग (स्ट्राइक रेट) विराटच्या तुलनेत अधिक होता, ज्यामुळे इंग्लंडच्या गोटात घबराट पसरली होती.

भारतीय संघाने केवळ संजूच्या जोरावरच नव्हे, तर सांघिक कामगिरीच्या जोरावर २० षटकांत २५३ धावांचा डोंगर उभा केला. टी-२० विश्वचषकाच्या इतिहासातील ही कोणत्याही संघाने केलेली सर्वोच्च धावसंख्या ठरली आहे.

संजूला इशान किशन (१८ चेंडूंत ३९ धावा) आणि शिवम दुबे (२५ चेंडूंत ४३ धावा) यांनी मोलाची साथ दिली. शिवम दुबेने मारलेले षटकार प्रेक्षकांसाठी मेजवानीच ठरले. यासह भारतीय संघ टी-२० मध्ये दोनदा २५० पेक्षा जास्त धावा करणारा जगातील पहिला संघ ठरला आहे.

षटकारांचा पाऊस

या सामन्यात भारतीय फलंदाजांनी एकूण १९ षटकार ठोकले, जो एका डावात कोणत्याही संघाने मारलेला सर्वाधिक षटकारांचा विक्रम आहे. इंग्लंडचे गोलंदाज भारतीय फलंदाजांच्या आक्रमणापुढे पूर्णपणे हतबल दिसले. सुरुवातीच्या पॉवरप्लेपासूनच भारतीय फलंदाजांनी आक्रमक पवित्रा घेतल्यामुळे इंग्लंडची रणनीती पूर्णपणे कोलमडली. संजू सॅमसनची ही खेळी त्याच्या कारकिर्दीतील मैलाचा दगड ठरली असून, त्याने टीकाकारांना आपल्या बॅटनेच चोख उत्तर दिले आहे.