भारताचा महान फलंदाज सचिन तेंडुलकर सध्या जम्मू-काश्मीर दौऱ्यावर आहे. तो कुटुंबासह सहलीसाठी जम्मू-काश्मीरला गेला आहे. दरम्यान, त्याच्या या दौऱ्यादरम्यानचे काही व्हिडिओ आणि फोटोही त्याने शेअर केले आहेत. नुकताच त्याचा काश्मीरच्या रस्त्यावर क्रिकेट खेळतानाचा व्हिडिओही व्हायरल होत आहे.
या सहलीदरम्यान सचिनने काश्मीरमधील प्रसिद्ध बॅट फॅक्टरी काश्मीर विलोला देखील भेट दिली. याबद्दल त्यानेच एक भावनिक पोस्ट शेअर केली होती. त्याने यावेळी कॅप्शनमध्ये त्याच्या बहिणीने त्याला पहिली कॅश्मीर विलो बॅट दिली असल्याची आठवणही सांगितली होती.
इतकेच नाही, तर तो त्यानंतर काश्मीरमधील रस्त्यावर उतरून क्रिकेटही खेळला. याचा व्हिडिओही शेअर करताना त्याने लिहिले की 'क्रिकेट आणि काश्मीर: स्वर्गसुंदर सामना'.
सचिनने शेअर केलेल्या व्हिडिओमध्ये दिसते की सचिन रस्त्यावर क्रिकेट खेळणाऱ्या लोकांजवळ जातो आणि त्यांना विचारतो की 'आम्ही खेळू?' तो यावेळी गोलंदाज कोण आहे, असेही विचारताना दिसत आहे.
त्यानंतर तो बॅट हातात घेतो आणि काही शॉट्स खेळतो. त्यानंतर शेवटचा चेंडू आहे असं सांगत बॅट उलटी धरतो आणि सांगतो की यावर त्याला आउट करा. मात्र, उलट्या बॅटनेही सचिन शॉट खेळला. सचिनच्या या व्हिडिओला सध्या चाहत्यांकडून मोठा प्रतिसाद मिळत आहे.
सचिनबरोबर त्याच्या या दौऱ्यात त्याची पत्नी अंजली आणि मुलगी सारा आहे. सचिनने भारत आणि पाकिस्तानला जोडणाऱ्या कमान अमन सेतूलाही या सहलीदरम्यान भेट दिली होती.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.