विजय हजारे ट्रॉफी 2022 या चालू एकदिवसीय देशांतर्गत स्पर्धेत महाराष्ट्राचा कर्णधार ऋतुराज गायकवाडने सोमवारी एकाच षटकात सलग 7 षटकार मारण्याचा पराक्रम केला आहे. त्याने उत्तर प्रदेशविरुद्ध उपांत्यपूर्व सामन्यात ही कामगिरी केली आहे. याबरोबरच अहमदाबादमध्ये झालेल्या या सामन्यात त्याने द्विशतकही झळकावले आहे.

ऋतुराज सध्या दमदार लयीत आहे. त्याची हीच लय उत्तर प्रदेशविरुद्धही कायम राहिली. त्याने महाराष्ट्राच्या (Maharashtra) डावातील 49 व्या षटकात उत्तर प्रदेशचा गोलंदाज शिवा सिंग विरुद्ध सलग 7 षटकार मारले.

ऋतुराजने (Ruturaj Gaikwad) या षटकातील पहिल्या चार चेंडूवर षटकार ठोकले. पण, नंतर 5 वा चेंडू नो-बॉल ठरला होता, पण यावरही ऋतुराजने षटकार मारला. तसेच त्याने शिवा सिंगने पुन्हा टाकलेल्या 5 व्या चेंडूवरही षटकार ठोकला. त्यामुळे या षटकात त्याच्या नावावर सलग 7 षटकारांची नोंद झाली. त्याने या षटकात या 7 षटकारांसह तब्बल 43 धावा केल्या.

दरम्यान, त्याने या सामन्यात एकूण 159 चेंडूत 220 धावा केल्या. या खेळीत त्याने 16 षटकार आणि 10 चौकार मारले. त्याच्याव्यतिरिक्त महाराष्ट्राकडून या सामन्यात अंकित बावणे आणि अझिम काझीने प्रत्येकी 37 धावांची खेळी केली. त्यामुळे महाराष्ट्राने 50 षटकांत 5 बाद 330 धावा केल्या.

ऋतुराज दमदार लयीत

ऋतुराजने याच स्पर्धेत आधी रेल्वेविरुद्ध 124 धावांची खेळी केली होती. तसेच बंगालविरुद्ध 40 धावा केल्या होत्या. त्याआधी त्याने सय्यद मुश्ताक अली टी20 ट्रॉफी 2022 स्पर्धेतही दोन शतके झळकावलेली.