Rishabh Pant Knee Surgery: भारताचा सुपरस्टार यष्टीरक्षक फलंदाज ऋषभ पंतचा 30 डिसेंबर रोजी दिल्लीहून रुरकीला जात असताना अपघात झाला. यामध्ये त्याच्या कपाळाला आणि गुडघ्याला गंभीर दुखापत झाली होती. त्यानंतर त्याला डेहराडूनहून मुंबईला उपचारासाठी हलवण्यात आले होते. मात्र, आता पंतच्या हवाल्याने भारतीय चाहत्यांसाठी मोठी बातमी समोर आली आहे.

शस्त्रक्रिया यशस्वी

पंतच्या चाहत्यांसाठी एक आनंदाची बातमी आहे. क्रिकेटपटू ऋषभ पंतच्या गुडघ्यावर काल मुंबईतील (Mumbai) एका खासगी रुग्णालयात यशस्वी शस्त्रक्रिया करण्यात आली. पंत वैद्यकीय पथकाच्या देखरेखीखाली असून त्याच्या तब्येतीत वेगाने सुधारणा होत आहे. डॉ. पार्डीवाला आणि त्यांच्या टीमने शुक्रवारी सकाळी 10.30 च्या सुमारास ही शस्त्रक्रिया केली, जी सुमारे दोन ते तीन तास चालली.

पंतचा भीषण अपघात झाला

25 वर्षीय ऋषभ पंत 30 डिसेंबरच्या सकाळी आपल्या आईला भेटण्यासाठी दिल्लीहून रुरकीला जात होता. त्यानंतर त्याची कार दुभाजकाला धडकली. यानंतर हरियाणा रोडवेजच्या बस ड्रायव्हर आणि कंडक्टरने पंतला कारमधून बाहेर काढले आणि तात्काळ रुग्णालयात नेले. पंत कारमधून बाहेर पडताच गाडीने पूर्णपणे पेट घेतला होता. दुसरीकडे, त्याच्या एमआरआय स्कॅन अहवालात कोणतीही अडचण नाही. बीसीसीआय (BCCI) सातत्याने पंतच्या संपर्कात आहे. त्याचबरोबर पंत लवकर बरा व्हावा यासाठी संपूर्ण देश प्रार्थना करत आहे.

भारतासाठी तिन्ही फॉरमॅट खेळलो

ऋषभ पंत टीम इंडियासाठी तिन्ही फॉरमॅटमध्ये क्रिकेट खेळला आहे. तो विस्फोटक फलंदाजीसाठी ओळखला जातो. भारतीय संघाला त्याने एकट्याने ऑस्ट्रेलियात मालिका जिंकून दिली आहे. विशेष म्हणजे, पंतने भारतासाठी 33 कसोटी सामने, 30 एकदिवसीय सामने आणि 66 टी-20 सामने खेळले आहेत.