IPL 2026 Points Table Today: आयपीएल 2026 च्या रोमांचक प्रवासात बुधवारी (15 एप्रिल) झालेल्या सामन्यात रॉयल चॅलेंजर्स बंगळुरुने लखनौ सुपर जायंट्सचा 5 गडी राखून पराभव करत दिमाखदार विजय मिळवला. या विजयामुळे आरसीबीने केवळ दोन गुणच कमावले नाहीत, तर थेट गुणतालिकेत अव्वल स्थानी झेप घेत आपला दबदबा निर्माण केला. दुसरीकडे मात्र या पराभवामुळे लखनौला मोठा धक्का बसला असून सध्या आयपीएलमध्ये तीन प्रमुख संघांमध्ये पहिल्या स्थानासाठी काट्याची टक्कर पाहायला मिळत आहे.

रॉयल चॅलेंजर्स बंगळुरुने (RCB) या हंगामात आतापर्यंत 5 सामने खेळले असून त्यापैकी 4 सामन्यांत विजय मिळवला, तर केवळ एका सामन्यात त्यांना पराभवाचा सामना करावा लागला. 8 गुणांसह आरसीबी आता गुणतालिकेत पहिल्या क्रमांकावर विराजमान झाली. आरसीबीच्या या कामगिरीमुळे राजस्थान रॉयल्सला आपल्या स्थानावरुन खाली उतरावे लागले असून राजस्थानचा संघ 8 गुणांसह दुसऱ्या स्थानी सरकला. जरी राजस्थान आणि आरसीबीचे गुण समान असले, तरी चांगल्या धावगतीच्या जोरावर बंगळुरुने पहिले स्थान काबीज केले.

गुणतालिकेतील इतर स्थानांचा विचार करता, पंजाब किंग्स 7 गुणांसह तिसऱ्या क्रमांकावर असून ते देखील अव्वल दोन संघांना कडवे आव्हान देत आहेत. चौथ्या स्थानावर सनरायझर्स हैदराबाद आणि पाचव्या स्थानावर दिल्ली कॅपिटल्स प्रत्येकी 4 गुणांसह स्थिरावले आहेत. सहाव्या क्रमांकावर गुजरात टायटन्सचा संघ 4 गुणांसह कायम आहे. आरसीबीकडून पराभूत झालेला लखनौ सुपर जायंट्सचा संघ 4 गुणांसह सातव्या स्थानावर आहे, तर बलाढ्य मानला जाणारा चेन्नई सुपर किंग्स 5 गुणांसह आठव्या क्रमांकावर आहे.

तालिकेच्या तळाला असलेल्या संघांची चिंता वाढली असून मुंबई इंडियन्स 2 गुणांसह नवव्या, तर कोलकाता नाईट रायडर्स अवघ्या 1 गुणासह दहाव्या स्थानावर आहे. आरसीबीच्या या विजयाने चाहत्यांमध्ये उत्साहाचे वातावरण असून यंदा 'ई साला कप नाम्दे'चे स्वप्न पूर्ण होईल अशी आशा व्यक्त केली जात आहे. आगामी सामन्यांमध्ये अव्वल तीन संघांमधील ही चुरस अधिकच वाढणार असून प्ले-ऑफच्या शर्यतीत कोण बाजी मारणार याकडे क्रिकेटप्रेमींचे लक्ष लागले आहे.