रवींद्र जडेजा आणि चेन्नई सुपर किंग्जमध्ये (CSK) सर्व काही ठीक आहे असे म्हणता येणार नाही. कारम जडेजाचे तरी असे काही लक्षणे दिसत नाही. जडेजाने गेल्या 3 वर्षातील चेन्नई सुपर किंग्जशी संबंधित सर्व पोस्ट त्याच्या इंस्टाग्रामवरून हटवल्या आहेत. तेव्हापासून जडेजा आणि आयपीएल फ्रँचायझी सीएसके यांच्यातील नात्यात दुरावा वाढला असून भविष्यात दोघांचे मार्ग वेगळे असू शकतात, अशी अटकळ बांधली जात आहे. जडेजा आणि CSK ने सोशल मीडिया प्लॅटफॉर्मवर एकमेकांना आधीच अनफॉलो केले आहे आणि आता अष्टपैलू खेळाडूने चेन्नई सुपर किंग्जशी संबंधित सर्व पोस्ट काढून टाकल्या आहेत. (CSK Ravindra jadeja controversy)

अशा परिस्थितीत जडेजा आणि सीएसके संघ व्यवस्थापन यांच्यातील संबंध बिघडले असल्याचे चाहत्यांनाही वाटू लागले आहे. महेंद्रसिंग धोनीला (MS Dhoni) दरवर्षी वाढदिवसाच्या शुभेच्छा देणाऱ्या जडेजाने यावेळी आपल्या जुन्या मित्राला म्हणजे धोनीला वाढदिवसाच्या शुभेच्छाही दिल्या नाहीत.

जडेजा 2012 मध्ये चेन्नई सुपर किंग्जशी संबंधित होता आणि तेव्हापासून या संघासाठी तो खेळत होता. गेल्या 10 वर्षांत त्याने CSK सोबत 2 IPL विजेतेपदेही जिंकली. IPL 2022 च्या काही दिवस आधी, महेंद्रसिंग धोनीने कर्णधारपद सोडल्यानंतर 33 वर्षीय जडेजाला 4 वेळा चॅम्पियन टीम चेन्नई सुपर किंग्जचे कर्णधार बनवण्यात आले होते. पण, अचानक दिलेली कर्णधारपदाची जबाबदारी जडेजाला नीट सांभाळता आली नाही. त्याच्या नेतृत्वाखाली गतविजेत्या चेन्नई सुपर किंग्जने खराब कामगिरी केली. आणि संघ एकामागून एक सामने हरत राहिला. त्याच्या नेतृत्वाखाली CSK ने 8 पैकी फक्त 2 सामने जिंकले.

जडेजाने आयपीएलच्या मध्यातच कर्णधारपद सोडले होते

दबावामुळे जडेजाचा स्वतःचा खेळही बिघडला. त्याने 10 सामन्यात 19 च्या सरासरीने केवळ 116 धावा केल्या आणि फक्त 5 विकेट घेतल्या. यानंतर त्याने हंगामाच्या मध्यातच संघाचे कर्णधारपद सोडले आणि धोनी पुन्हा कर्णधार झाला. तेव्हापासून जडेजा आणि CSKचं संबध बिघडत गेले. आणि आता हा अष्टपैलू खेळाडू संघ सोडण्याच्या तयारीत असल्याच्या चर्चा रंगत आहे.

वेस्ट इंडिज दौऱ्यासाठी निवडलेल्या भारतीय संघाचा उपकर्णधार बनल्याबद्दल सीएसकेने अलीकडेच जडेजाचे त्याच्या इन्स्टाग्राम अकाउंटवर अभिनंदन केले. पण, जडेजाने त्याच्या इन्स्टाग्राम अकाऊंटवरून सीएसकेशी संबंधित पोस्ट हटवून वाद पुन्हा पेटवला आहे.