Pakistan Cricket Controversy: इंग्लंडविरुद्धच्या कसोटी मालिकेत दारुण पराभवाचा सामना करत असलेला पाकिस्तान क्रिकेट संघ सध्या विवादाच्या भोवऱ्यात अडकला आहे. लॉर्ड्स कसोटीतील लाजीरवाण्या पराभवानंतर पाकिस्तान क्रिकेट बोर्डाने एकाच वेळी तब्बल 7 खेळाडूंना संघातून बाहेरचा रस्ता दाखवला. या अभूतपूर्व कारवाईने क्रिकेट जगतात खळबळ उडाली असतानाच, संघाचे मुख्य प्रशिक्षक सर्फराज अहमद आणि गोलंदाज प्रशिक्षक उमर गुल हे देखील मालिका अर्ध्यावर सोडून मायदेशी परतले आहेत. यामुळे पाकिस्तान क्रिकेटमधील अंतर्गत कलह आणि अराजकता पुन्हा एकदा जगासमोर आली.

परिस्थिती इतक्यावरच थांबलेली नाही, तर या संपूर्ण नाट्यात आता आणखी एक नवा ट्विस्ट आला आहे. इंग्लंडविरुद्धच्या या महत्त्वाच्या कसोटी मालिकेसाठी मोहम्मद रिझवान आणि इमाम उल हक या दोन वरिष्ठ खेळाडूंची निवड का करण्यात आली होती? असा सवाल क्रिकेट चाहत्यांसह आता थेट पीसीबी (PCB) विचारत आहे. संघाची ही ढासळलेली अवस्था पाहून पीसीबीचे अध्यक्ष मोहसीन नक्वी प्रचंड संतापले असून त्यांनी निवड समितीला चांगलेच धारेवर धरले आहे. जिओ न्यूजच्या वृत्तानुसार, 31 ऑगस्ट रोजी पीसीबीने निवड समितीच्या सदस्यांना कारणे दाखवा नोटीस बजावली आहे.

या नोटिशीमध्ये मोहम्मद रिझवान आणि इमाम उल हक यांच्या नावांची शिफारस कसोटी संघासाठी नेमक्या कोणत्या निकषांवर आणि कारणांमुळे करण्यात आली होती, याचे स्पष्टीकरण मागवण्यात आले आहे. सततचे पराभव, प्रशिक्षकांची माघार आणि आता निवड समितीवर झालेली कारवाई यामुळे पाकिस्तान क्रिकेट बोर्डात सध्या प्रचंड उलथापालथ सुरु आहे. येत्या दिवसांत या प्रकरणी आणखी काही कठोर निर्णय घेतले जाण्याची शक्यता वर्तवली जात आहे.