पणजी: आंतरमहाविद्यालयीन पुरुष सायकलिंग स्पर्धेत नावेलीच्या रोझरी महाविद्यालयाने सांघिक विजेतेपद प्राप्त केले. गोवा विद्यापीठाच्या मान्यतेने रोझरी महाविद्यालयातर्फे स्पर्धा घेण्यात आली. सांघिक गटात केपे सरकारी महाविद्यालयास उपविजेतेपद, तर कुठ्ठाळीच्या सेंट जोसेफ वाझ महाविद्यालयास तिसरा क्रमांक मिळाला. 35 किलोमीटर अंतराच्या या स्पर्धेत विविध महाविद्यालयांतील 60 स्पर्धक सहभागी झाले होते.

दरम्यान, वैयक्तिक गटात मडगावच्या पार्वतीबाई चौगुले महाविद्यालयाच्या मार्क जुझे फर्नांडिस याने पहिला क्रमांक मिळविला. रोझरी महाविद्यालयाच्या वालंको फर्नांडिस याला दुसरा, तर मिरामारच्या व्ही. एम. साळगावकर कायदा महाविद्यालयाच्या अमित सुकठणकर याला तिसरा क्रमांक मिळाला.

दुसरीकडे, मडगावच्या गोविंद रामनाथ कारे महाविद्यालयाचे शारीरिक शिक्षण आणि क्रीडा संचालक मनोज हेदे, नावेलीच्या रोझरी महाविद्यालयाचे प्रिन्सिपल हेलिक बार्रेटो यांच्या हस्ते बक्षीस वितरण झाले. यावेळी रोझरी महाविद्यालयाचे फ्रान्सिस लोबो, केपे सरकारी महाविद्यालयाचे राजन मॅथ्यू, पार्वतीबाई चौगुले महाविद्यालयाचे देवाशिष बागची, आवेर्तान बार्रेटो, एलरॉय पिंटो यांची उपस्थिती होती.