ऑस्ट्रेलियात होणाऱ्या T20 क्रिकेट विश्वचषकाला (T20 World Cup) रविवारपासून सुरूवात झाली. पात्रता फेरीतील पहिलाच श्रीलंका आणि नामिबिया यांच्यात खेळला गेला. दुबळ्या समजल्या जाणाऱ्या नामिबियाने श्रीलंकेला चांगलाच धक्का दिला असून, श्रीलंकेचा 55 धावांनी पराभव केला. नामिबियाने प्रथम फलंदाजी करताना श्रीलंकेसमोर 164 धावांचे लक्ष्य ठेवले होते. प्रत्युत्तरात श्रीलंकेचा डाव 19 षटकांत 108 धावांवर आटोपला.

नामिबियाच्या विजयाने क्रिकेट विश्वात अनेकांकडून आश्चर्य व्यक्त केले जात आहे. जगातील अनेक दिग्गज खेळाडूंनी नामिबियाचे कौतुक करत त्यांना पुढील वाटचालीसाठी शुभेच्छा दिल्या आहेत. भारताचा माजी क्रिकेटपटू विरेंद्र सेहवागने देखील नामिबिया संघाच्या विजयावर प्रतिक्रिया दिली आहे. "नाम तो सुना ही होगा" नामिबिया संघाने श्रीलंकेविरोधात उत्कृष्ट खेळ केला. असे ट्विट विरेंद्र सेहवागने केले आहे.

एवढेच नव्हे तर क्रिकेटचा देव सचिन तेंडुलकरने देखील नामिबिया संघाचे कौतुक केले आहे. "नामिबिया संघाने क्रिकेट विश्वाला आज सांगितले की... नाव लक्षात ठेवा" असे ट्विट सचिन तेंडुलकरने केले आहे. सचिनच्या या ट्विटला नामिबिया संघाच्या कर्णधाराने प्रतिक्रिया दिली आहे. नामिबियाचा कर्णधार गेराड इरॉसमस याने सचिनच्या ट्विटला रिट्विट करत "नाम याद रखना" असे ट्विट केले आहे.

आशिया चषकात श्रीलंकेने उत्तम कामगिरी करत, चषकावर नाव कोरले आहे. नामिबियाविरोधात पराभव झाल्याने श्रीलंकेला धक्का बसला आहे. आता श्रीलंकेला सुपर 12 मध्ये स्थान मिळवण्यासाठी इतर सर्व सामन्यांमध्ये चांगला खेळ करावा लागणार आहे.