Mohammad Rizwan: ICC T20 क्रमवारीत मोठा बदल झाला आहे. पाकिस्तान संघाचा कर्णधार बाबर आझमचे T20 आंतरराष्ट्रीय क्रिकेटमधील क्रमांक एकचे स्थान त्याच्याच सहकाऱ्याने हिरावून घेतले आहे. त्याची खुर्ची पाकिस्तान संघाचा सलामीवीर आणि सहकारी फलंदाज मोहम्मद रिझवानने हिसकावून घेतली आहे. यष्टिरक्षक फलंदाज मोहम्मद रिझवान हा T20 क्रिकेटमधील नंबर वन फलंदाज बनला आहे. त्याचवेळी सूर्यकुमार यादव तिसऱ्या क्रमांकावरुन चौथ्या क्रमांकावर घसरला आहे.

दरम्यान, मोहम्मद रिझवानने (Mohammad Rizwan) हाँगकाँग आणि भारताविरुद्ध शानदार कामगिरी केली होती, ज्यामुळे त्याला आयसीसी (ICC) टी-20 क्रमवारीत मदत झाली. रिझवानच्या खात्यात सध्या 815 रेटिंग गुण आहेत, तर बाबर आझमच्या खात्यात 794 रेटिंग गुण आहेत. दक्षिण आफ्रिकेचा (South Africa) फलंदाज एडन मार्कराम 792 गुणांसह तिसऱ्या स्थानावर आहे, तर सूर्यकुमार यादव (Suryakumar Yadav) 775 गुणांसह चौथ्या स्थानावर आहे.

तसेच, श्रीलंकेविरुद्ध (Sri Lanka) 72 धावांची खेळी करणारा रोहित शर्मा 17 व्या स्थानावरुन 14 व्या स्थानावर पोहोचला आहे. टॉप 10 मध्ये सूर्यकुमार यादव हा एकमेव भारतीय आहे. रोहित शर्मा आणि ईशान किशन टॉप 20 मध्ये आहेत. बाबर आझम एकदिवसीय क्रिकेटमध्ये पहिल्या क्रमांकावर आहे, तर जो रुट कसोटी क्रिकेटमध्ये पहिल्या क्रमांकावर आहे.