पणजी: अखिल भारतीय मास्टर्स मानांकन बॅडमिंटन (Master Badminton) स्पर्धेतील 55+ ते 75+ वयोगटातील टप्पा संपला. त्यात माया चावत हिने तीन, तर महंमद अली बेग, ओल्गा डिकॉस्ता, बीना शेट्टी, गीता नेगी यांनी प्रत्येकी दोन सुवर्णपदके (Gold Medal) जिंकून चमक दाखविली. आता गुरुवारपासून (ता. 23) 35+ ते 50+ वयोगटातील दुसरा टप्पा नावेली येथील मनोहर पर्रीकर इनडोअर स्टेडियममध्ये (Manohar Parrikar Indoor Stadium) खेळला जाईल.

55+ ते 75+ वयोगटात गोव्याच्या डॉ. सतीश कुडचडकर याने एक सुवर्ण व दोन रौप्य, डॉ. सिक्लेटिका रिबेलो हिने दोन सुवर्ण व एक ब्राँझ, पर्पेच्युआ जॅकिस हिने एक सुवर्ण व एक रौप्यपदक जिंकले. बुधवारी डॉ. सिक्लेटिका रिबेलो हिला 75+ वयोगटातील महिला एकेरीत ब्राँझपदकावर समाधान मानावे लागले. 70+ वयोगटातील मिश्र दुहेरीत भारती हेबळे व सुरेश प्रभू वेंगुर्लेकर जोडीलाही ब्राँझपदक मिळाले. 70+ वयोगटातील मिश्र दुहेरीत हिलरी फर्नांडिस व मॅलाक्विना फर्नांडिस यांना रौप्यपदक मिळाले.

35+ ते 50+ वयोगटातील स्पर्धा गुरुवार ते रविवारी या कालावधीत खेळली जाईल. या स्पर्धेत श्रीकांत बक्षी, अमरिश शिंदे, अजय भागवत किरण मकोडे, विक्रम भसीन, एस. बानू, विजय लॅन्सी, जे. बी. एस. विद्याधर, जॉय अँथनी, शालिनी शेट्टी हे प्रमुख खेळाडू आहेत. गोमंतकीय खेळाडूंत गतवर्षी राष्ट्रीय मास्टर्स स्पर्धेत तीन सुवर्णपदके जिंकलेली संध्या मेलाशीमी, संदीप व कमलेश हे कांजी बंधू, अमित कक्कर, विशाल वेर्णेकर, पराग चौहान, डार्विन बार्रेटो, किशोर रघुबंस, वामन फळारी, विल्फ्रेड जॅकिस, सी. के. शमसुद्दीन व सी. के. अयुब यांचा समावेश आहेत.