बुद्धिबळ खेळून चांगले नागरिक बना: खासदार तेंडुलकर

पणजी: बुद्धिबळ खेळून देशाचे चांगले नागरिक बना, असा सल्ला गोवा बुद्धिबळ संघटनेचे अध्यक्ष राज्यसभा खासदार विनय तेंडुलकर यांनी राज्यातील युवा बुद्धिबळपटूंना दिला. ते संघटनेतर्फे घेण्यात आलेल्या 8 वर्षांखालील अखिल गोवा बुद्धिबळ निवड चाचणी स्पर्धेच्या बक्षीस वितरण सोहळ्यात बोलत होते.

समारंभास मडगावच्या उपनगराध्यक्ष दीपाली सावळ, गोवा बुद्धिबळ संघटनेचे सचिव शरेंद्र नाईक, खजिनदार किशोर बांदेकर, संयुक्त सचिव समीर नाईक, सासष्टी तालुका बुद्धिबळ संघटनेचे सचिव सुनील बाळ्ळीकर, राज्य संघटनेचे स्वीकृत सदस्य दिगंबर सावळ, माजी राज्य विजेते बुद्धिबळपटू वसंत नाईक यांची उपस्थिती होती. स्पर्धेतील बक्षिसे दिगंबर सावळ यांनी पुरस्कृत केली होती.

कोराना विषाणू महामारीमुळे 8 वर्षांखालील बुद्धिबळ स्पर्धा ऑनलाईन पद्धतीने घेण्यात आली होती. स्पर्धेतील विजेते: खुला गट (पहिले सहा स्पर्धक): सरस पोवार, रुद्र नगर्सेकर, आरव प्रभुगावकर, आर्यन नाईक, पृथ्विज गावडे, मॅकेअर गोम्स. मुली (पहिले सहा स्पर्धक): रोशेल परेरा, दिया सावळ, जेन्सिना सिक्वेरा, स्कायला रॉड्रिग्ज, रुपिका रायकर, म्युरियल फर्नांडिस.