पणजी: इंडियन सुपर लीग ( ISL) फुटबॉल स्पर्धेतील संघाचे मुख्य प्रशिक्षक बनणारे खलिद जमील (Khalid Jameel) हे पहिले भारतीय मार्गदर्शक ठरले आहेत. गुवाहाटीच्या नॉर्थईस्ट युनायटेडने आगामी मोसमासाठी जमील यांच्याकडे संघाची सूत्रे सोपविली आहेत.

गतमोसमात (2020-21) जमील यांनी नॉर्थईस्ट युनायटेडचे हंगामी प्रशिक्षक या नात्याने जबाबदारी निभावली होती. गेरार्ड नूस यांनी यावर्षी जानेवारी गुवाहाटीच्या संघाचे प्रशिक्षकपद सोडल्यानंतर बाकी आयएसएल मोसमात सहाय्यक प्रशिक्षक असलेल्या जमील यांनी संघाला मार्गदर्शन केले होते. 44 वर्षीय जमील यांच्या मार्गदर्शनाखाली नॉर्थईस्ट युनायटेडने आयएसएल स्पर्धेच्या उपांत्य फेरीत स्थान मिळविले होते. जमील यांच्याकडे सूत्रे असताना नॉर्थईस्ट संघ सलग नऊ सामने अपराजित राहिला.

2021-22 मोसमासाठी जमील नॉर्थईस्ट युनायटेडचे पूर्णवेळ मुख्य प्रशिक्षक असतील. नव्या आयएसएल मोसमात जमील यांच्या मार्गदर्शखाली नॉर्थईस्ट युनायटेड संघ पहिला सामना येत्या 20 नोव्हेंबरला बांबोळी येथील ॲथलेटिक्स स्टेडियमवर बंगळूर एफसीविरुद्ध खेळेल. जमील जन्म कुवेतमध्ये झाला असून त्यांचे आई-वडील भारतीय आहेत. मध्यरक्षक या नात्याने खेळताना त्यांनी महिंद्र युनायटेड, एअर इंडिया, मुंबई एफसी या संघाचे क्लब पातळीवर, तर भारतातर्फे आंतरराष्ट्रीय पातळीवरही प्रतिनिधित्व केले. 2019-20 मोसमात नॉर्थईस्ट युनाटेडने त्यांची सहाय्यक प्रशिक्षकपदी नियुक्ती केली. त्यापूर्वी 2017 साली जमील यांच्या मार्गदर्शनाखाली ऐजॉल एफसीने आय-लीग विजेतेपद मिळविले होते.