गोवा प्रोफेशनल लीग फुटबॉल स्पर्धेतील लढत नाट्यमय...

पणजी: गोवा प्रोफेशनल लीग फुटबॉल (Football) स्पर्धेत स्पोर्टिंग क्लब द गोवा आणि वास्को स्पोर्टस क्लब यांच्यातील लढतीत शेवटची पाच मिनिटे कमालीची नाट्यमय ठरली. एक खेळाडू (Players) कमी होऊनही वास्कोने गतविजेत्यांना पेनल्टी गोलमुळे 1-1 असे गोलबरोबरीत रोखले. सामना शनिवारी म्हापसा येथील धुळेर स्टेडियमवर झाला.

अकेराज मार्टिन्सने 85 व्या मिनिटास स्पोर्टिंगला आघाडी मिळवून दिली, नंतर 88 व्या मिनिटास जॉस्टन कार्दोझने पेनल्टी फटक्यावर अचूक नेम साधत वास्को क्लबला बरोबरी साधून दिली. सामना संपण्यापूर्वी करण शिरोडकरला रेड कार्ड मिळाल्यामुळे काही काळ वास्को क्लबला दहा खेळाडूंसह खेळावे लागले. स्पोर्टिंग क्लब,(Sporting Club) तसेच वास्को क्लबचे आता प्रत्येकी दोन सामने खेळल्यानंतर समान चार गुण झाले आहेत.

सामना कमालीचा रंगतदार ठरला, तसेच प्रतिस्पर्धी खेळाडूंच्या सततच्या टॅकल्सनी गाजला. विश्रांतीनंतर आठव्या मिनिटास गोलक्षेत्रात स्पोर्टिंगच्या रोहित तोताड याला वास्कोच्या(Vasco) खेळाडूने पाडले, स्पोर्टिंगने पेनल्टी फटक्याचा दावा केला, पण रेफरीने त्याकडे दुर्लक्ष केले. सामना गोलशून्य बरोबरीकडे झुकत असताना स्पोर्टिंगने जोरदार मुसंडी मारली. वास्कोच्या खेळाडूंचा पहारा असतानाही अकेराज मार्टिन्सने सणसणीत फटक्यावर प्रतिस्पर्धी गोलरक्षकाचा अंदाज चुकविला. सामन्यातील दोन मिनिटे बाकी असताना स्पोर्टिंगच्या गिरीश नाईकने जॉस्टन कार्दोझला गोलक्षेत्रात पाडले.

यावेळी स्वतः जॉस्टनने पेनल्टी फटका योग्यपणे मारत वास्कोला बरोबरी साधून दिली. स्पोर्टिंगच्या रोहित तोताड याला धोकादायकरीत्या पाडल्यामुळे वास्कोच्या करण शिरोडकरला रेफरीने मैदानाबाहेर पाठविले.

सेझाचे पणजी फुटबॉलर्सला आव्हान

गोवा प्रोफेशनल लीग (Goa Professional League) फुटबॉल स्पर्धेत रविवारी सेझा फुटबॉल अकादमीचे पणजी फुटबॉलर्ससमोर आव्हान असेल. सेझाने अगोदरच्या लढतीत साळगावकर FC ला गोलबरोबरीत रोखले असून पणजी फुटबॉलर्सला स्पोर्टिंगकडून हार पत्करावी लागली होती.