Kevin O’Brien Retirement: आयर्लंडचा विस्फोटक फलंदाज केविन ओब्रायनने आंतरराष्ट्रीय क्रिकेटमधून निवृत्ती घेतली आहे. त्याने 2006 मध्ये आयर्लंडसाठी पहिला सामना खेळला होता. 16 वर्षांच्या कारकिर्दीत त्याने अनेक उत्कृष्ट खेळी खेळल्या. इंग्लंडविरुद्ध त्याने दोनदा शतक झळकावले. आयर्लंडसाठी पहिले कसोटी शतक झळकावण्याचा बहुमानही त्याच्या नावावर आहे. आयर्लंडला सहयोगी देशाकडून कसोटी खेळणाऱ्या देशाचा दर्जा मिळवून देण्यात केविन ओब्रायन याचाही मोठा वाटा आहे. त्याच्या नावावर अनेक खास रेकॉर्ड आहेत.

दरम्यान, केविन ओब्रायन (Kevin O Brien) हा एकदिवसीय क्रिकेटमध्ये आयर्लंडकडून सर्वाधिक बळी घेणारा गोलंदाज आहे. त्याने एकदिवसीय सामन्यांमध्ये 32.68 च्या सरासरीने आणि 5.20 च्या इकॉनॉमी रेटने एकूण 114 बळी घेतले. विश्वचषकात (World Cup) सर्वात जलद शतक झळकावणारा तो फलंदाजही ठरला आहे. 2011 च्या विश्वचषकात बंगळुरुच्या मैदानावर त्याने इंग्लंडविरुद्ध (England) तुफानी खेळी खेळली होती. यामध्ये त्याने अवघ्या 50 चेंडूत आपले शतक पूर्ण केले होते. आयर्लंडने त्यावेळी हा सामना जिंकला होता. या खेळीत त्याने 13 चौकार आणि सहा षटकार मारले होते. त्याने 113 धावांची शानदार खेळी खेळली होती. मात्र, त्याचा संघ जिंकण्याआधीच तो धावबाद झाला. अखेरीस आयर्लंडने 328 धावांच्या लक्ष्याचा पाठलाग करत सामना जिंकला.

आयर्लंडसाठी कसोटी शतक झळकावणारा पहिला खेळाडू

केविन ओब्रायन हा आयर्लंडमधील अशा खेळाडूंपैकी एक आहे, ज्याच्यामुळे आयर्लंडला कसोटी खेळण्याचा दर्जा मिळाला. 2017 मध्ये आयर्लंडला कसोटी खेळणाऱ्या राष्ट्राचा दर्जा मिळाल्यानंतर, केविन ओब्रायनने 2018 मध्ये पाकिस्तानविरुद्ध (Pakistan) शतक झळकावले होते. आपल्या देशासाठी कसोटी क्रिकेटमध्ये (Test Cricket) शतक झळकावणारा तो पहिला खेळाडू होता. या सामन्याच्या पहिल्या डावात 40 धावा करुन तो बाद झाला. तर दुसऱ्या डावात त्यांचा संघ चार गडी गमावून 95 धावांवर झुंजत होता. त्यावेळी आयर्लंडला सामना जिंकण्यासाठी 85 धावांची गरज होती.

दुसरीकडे, केविन ओब्रायन यापूर्वी प्रशिक्षकाच्या भूमिकेत दिसला आहे. इटली आणि एस्टोनियासाठी त्याने ही जबाबदारी पार पाडली आहे. आता 38 वर्षांचा केविन आता प्रशिक्षक म्हणून चमत्कार करायला तयार आहे.