Rohit Sharma: साल 2022 मध्ये बीसीसीआयने गेल्यावर्षी रोहित शर्माला सर्व प्रकारच्या क्रिकेट संघाचे पूर्णवेळ कर्णधार केले. तो पूर्णवेळ कर्णधार झाल्यापासून भारताने 68 सामनेही खेळले आहेत, मात्र त्यातील केवळ 39 सामन्यांत रोहित सहभागी झाला आहे. तो 29 सामने मुकण्यामागे दुखापती किंवा विश्रांती ही मुख्य कारणे राहिली.

पण, आता याच कारणामुळे भारताचे विश्वविजेते कर्णधार कपिल देव यांनी त्याच्या नेतृत्वावर प्रश्नचिन्ह उभे केले आहे. कपिल देव यांनी रोहित खेळाडू म्हणून उत्तम असल्याचे म्हटले आहे, पण त्यांनी त्याच्या तंदुरुस्तीवर प्रश्नचिन्ह उभे केले आहे.

('Is Rohit Sharma fit enough?' asked Kapil Dev)

'रोहित शर्मामध्ये काही कमी नाही, त्याच्याकडे सर्वकाही आहे. पण मला वैयक्तिकरित्या वाटते की त्याच्या तंदुरुस्तीवर मोठे प्रश्नचिन्ह आहे. तो पुरेसा तंदुरुस्त आहे का? कारण कर्णधाराने स्वत: संघातील अन्य खेळाडूंना तंदुरुस्त राहाण्यासाठी प्रेरणा दिली पाहिजे. संघसहकाऱ्यांना त्यांच्या कर्णधाराबद्दल अभिमान वाटला पाहिजे,' असे मत कपिल देव यांनी एबीपी न्यूजशी बोलताना मांडले.

कपिल देव पुढे म्हणाले, 'मी हे खात्रीने सांगू शकतो की रोहितच्या तंदुरुस्तीवर मोठी शंका आहे. तो कर्णधार झाल्यापासून त्याने खूप धावा केल्या नसल्याने त्याच्यावर टीकाही होत आहे. मी काहीप्रमाणात याच्याशी सहमत असलो, तरी मला वाटत नाही की त्याच्या खेळातील कौशल्यामध्ये काही समस्या आहेत. तो खूप यशस्वी क्रिकेटपटू आहे, जर तो तंदुरुस्त झााल, तर संपूर्ण संघ त्याच्याभोवती फिरेल.'

रोहित मागील महिन्यापासून हाताच्या अंगठ्याला झालेल्या दुखापतीमुळे भारतीय क्रिकेट संघातून बाहेर होता. त्याला बांगलादेश दौऱ्यातील वनडे मालिकेदरम्यान त्याला क्षेत्ररक्षण करताना चेंडू लागल्याने दुखापत झाली होती. आता तो 10 जानेवारीपासून सुरु होणाऱ्या श्रीलंकेविरुद्धच्या वनडे मालिकेतून भारतीय संघात पुनरागमन करेल.