Ireland vs India, 1st T20I, Weather and Live Streaming Details:

आयर्लंड विरुद्ध भारत संघात शुक्रवारपासून 3 सामन्यांची टी20 मालिका सुरू होणार आहे. या मालिकेतील पहिला सामना मलाहाईड, डब्लिन येथे होणार आहे.

या मालिकेत जसप्रीत बुमराह नेतृत्व करताना दिसणार आहे. त्यामुळे आंतरराष्ट्रीय टी20 मध्ये बुमराह पहिल्यांदाच कर्णधार म्हणून दिसणार आहे.

दरम्यान, भारताने आत्तापर्यंत आयर्लंडविरुद्ध 5 टी20 सामने खेळले असून सर्व 5 सामन्यात विजय मिळवला आहे.

तसेच  भारताचा हा एकूण आयर्लंडचा चौथा दौरा आहे. यापूर्वी भारताने 2007 मध्ये एकमेव वनडे सामना आयर्लंडला खेळला होता. त्यानंतर 2018 आणि 2022 साली भारताने 2 सामन्यांच्या टी20 मालिका आयर्लंडला खेळल्या.

आता एक वर्षाने पुन्हा भारतीय संघ आयर्लंडविरुद्ध टी20 सामने खेळणार आहे. पण, पहिल्या सामन्यात पावसाचा अडथळा येण्याची शक्यता आहे. पहिला टी20 सामना स्थानिक वेळेनुसार दुपारी 3 वाजता म्हणजेच भारतीय प्रमाणवेळेनुसार संध्याकाळी 7.30 वाजता सुरू होणार आहे.

याचदरम्यान हवामान अंदाजानुसार डब्लिनमध्ये दुपारी पावसाची शक्यता आहे. त्यामुळे सामना रद्द देखील होऊ शकतो किंवा सामन्यातील षटकांची संख्या कमी केली जाऊ शकते.

कुठे पाहाणार सामना

भारत आणि आयर्लंड यांच्यातील तिन्ही टी20 सामने मलाहाईडमधील द व्हिलेज मैदानावर खेळवले जाणार आहेत. हे तिन्ही सामने भारतीय प्रमाणवेळेनुसार संध्याकाळी 7.30 वाजता सुरू होणार आहेत.

तसेच या सामन्यांचे भारतात स्पोर्ट्स 18 या चॅनेलवर थेट प्रक्षेपण केले जाणार आहे, तर जिओ सिनेमा ऍपवर सामना ऑनलाईन पाहाता येणार आहे.

असे आहेत दोन्ही संघ

• भारत - जसप्रीत बुमराह (कर्णधार), ऋतुराज गायकवाड (उपकर्णधार), यशस्वी जयस्वाल, संजू सॅमसन (यष्टीरक्षक), तिलक वर्मा, रिंकू सिंह, वॉशिंग्टन सुंदर, जितेश शर्मा (यष्टीरक्षक), शिवम दुबे, शाहबाज अहमद, रवी बिश्नोई, प्रसिद्ध कृष्णा, अर्शदीप सिंग, मुकेश कुमार, आवेश खान.

• आयर्लंड - पॉल स्टर्लिंग (कर्णधार), अँड्र्यू बालबर्नी, मार्क अडायर, रॉस अडायर, कर्टिस कॅम्पर, गॅरेथ डेलेनी, जॉर्ज डॉकरेल, फिओन हँड, जोश लिटल, बॅरी मॅककार्थी, हॅरी टेक्टर, लॉर्कन टकर, थिओ व्हॅन वूरकोम, बेन व्हाइट, क्रेग यंग.