IPL 2026 Points Table: आयपीएल 2026 चा हंगाम आता अत्यंत अटीतटीच्या वळणावर आला असून रविवारी झालेल्या दोन महत्त्वपूर्ण लढतींनंतर गुणतालिकेत मोठी उलथापालथ पाहायला मिळत आहे. रविवारी झालेल्या पहिल्या सामन्यात कोलकाता नाईट रायडर्सने (KKR) सनरायझर्स हैदराबादचा (SRH) 7 गडी राखून पराभव केला. तर, दुसऱ्या सामन्यात गुजरात टायटन्सने (GT) पंजाब किंग्सवर 4 गडी राखून मात केली. या निकालांमुळे प्लेऑफची शर्यत कमालीची मनोरंजक झाली असून कोणता संघ अंतिम चारमध्ये स्थान मिळवेल, हे सांगणे आता कठीण झाले.

गुणतालिकेतील सध्याच्या स्थितीचा विचार केल्यास, गुजरात टायटन्सकडून पराभूत होऊनही पंजाब किंग्स 13 गुणांसह अद्याप पहिल्या क्रमांकावर कायम आहे. मात्र, पंजाब आणि इतर संघांमधील गुणांचे अंतर आता खूपच कमी झाले. पंजाब पाठोपाठ आरसीबी (RCB), सनरायझर्स हैदराबाद (SRH), राजस्थान रॉयल्स (RR) आणि गुजरात टायटन्स (GT) या चारही संघांच्या खात्यात प्रत्येकी 12 गुण जमा झाले. यामुळे यापैकी कोणताही संघ पुढील एका विजयासह पंजाबला मागे टाकून अव्वल स्थानी झेप घेऊ शकतो. दुसरीकडे, चेन्नई सुपर किंग्स (CSK) आणि दिल्ली कॅपिटल्स (DC) 8 गुणांसह शर्यतीत मागे आहेत, तर केकेआर 7 गुणांवर पोहोचला. मुंबई इंडियन्स आणि लखनौ सुपर जायंट्स (LSG) प्रत्येकी 4 गुणांसह तळाला आहेत.

दरम्यान, आज (4 मे) मुंबईच्या वानखेडे स्टेडियमवर मुंबई इंडियन्स आणि लखनौ सुपर जायंट्स यांच्यात 'करो या मरो'ची लढत रंगणार आहे. मुंबईचा हा 10 वा तर लखनौचा 9वा सामना असेल. जो संघ हा सामना जिंकेल, त्यांच्या खात्यात 6 गुण होतील. मात्र, विजयानंतरही हा संघ गुणतालिकेत 9व्या किंवा 10व्या स्थानावरच राहील. मुंबईसाठी हा सामना अत्यंत निर्णायक आहे; जर आज मुंबईचा संघ हरला, तर त्यांचे स्पर्धेतील आव्हान संपुष्टात येईल. लखनौने विजय मिळवला तर त्यांच्या प्लेऑफच्या आशा तांत्रिकदृष्ट्या जिवंत राहतील. त्यामुळे आजच्या सामन्यात दोन्ही संघांची प्रतिष्ठा पणाला लागली आहे.