IPL 2024 Players Auction, Travis Head and Harry Brook

इंडियन प्रीमीयर लीग 2024 स्पर्धेसाठी मंगळवारी (19 डिसेंबर) लिलाव होत आहे. हा लिलाव दुबईतील कोका-कोला एरिनामध्ये होत आहे. या लिलावात पहिल्यांदाच परदेशी फलंदाजांवर बोली लागताना दिसली.

पहिल्यांदा वेस्ट इंडिजचा रोवमन पॉवेलला राजस्थान रॉयल्सने 7. 40 कोटी रुपयांना त्याला खरेदी केले आहे. त्यानंतर गेल्यावर्षी चर्चेत आलेल्या हॅरी ब्रुकचे नाव लिलावात आले. हॅरी ब्रुकला दिल्ली कॅपिटल्सने 4 कोटी रुपयांना खरेदी केले.

विशेष म्हणजे ब्रुकला गेल्यावर्षी लिलावात सनरायझर्स हैदराबादने तब्बल 13.35 कोटी रुपयांना खरेदी केले होते. मात्र, त्याची कामगिरी फारशी चांगली झाली नाही. त्याला 11 सामन्यात 190 धावाच करता आल्या होत्या.

त्यानंतर ब्रुकला हैदराबादने आयपीएल 2024 लिलावापूर्वी करारमुक्त केले. अखेर या लिलावात ब्रुकला दिल्लीने संघात घेतले. मात्र, यंदा त्याला गेल्या वर्षीच्या तुलनेत तब्बल 9.25 कोटी रुपये कमी मिळाले.

हेड झाला हैदराबादचा सदस्य

दरम्यान, ट्रेविस हेडला सनरायझर्स हैदराबाजने आयपीएल 2024 लिलावात 6.80 कोटी रुपयात खरेदी केले. हेडचे नाव लिलावापूर्वी बरेच चर्चेत होते.

त्याने नुकतेच भारतात पार पडलेल्या वनडे वर्ल्डकप 2023 स्पर्धेत उपांत्य आणि अंतिम सामन्यात सामनावीर पुरस्कारही पटकावला होता. त्याने अंतिम सामन्यात भारताविरुद्ध शतक झळकावले होते. तसेच त्याच्याकडे फिरकी गोलंदाजी करण्याचीही क्षमता आहे. तसेच तो चांगल्या फॉर्ममध्येही आहे. त्यामुळे त्याला मोठी किंमत मिळेल, अशी अपेक्षा होती.

त्यानुसार लिलावात त्याला खरेदी करण्यासाठी हैदराबाद आणि चेन्नई सुपर किंग्स संघात चुरस दिसली, पण अखेर ही शर्यत हैदराबादने जिंकली.

दरम्यान, या लिलावात पहिल्या सेटमध्ये मनीष पांडे, करूण नायर आणि स्टीव्ह स्मिथ या मोठ्या नावांना बोली लागली नाही.