अमीरात क्रिकेट बोर्डने (ECB) सोमवारी जाहीर केले की, आमच्या T20 लीगचा पहिला हंगाम पुढील वर्षी होणार आहे. ECB ने याला आंतरराष्ट्रीय लीग T20 असे नाव दिले आहे. या T20 लीगचा पहिला हंगाम 2023 मध्ये 6 जानेवारी ते 12 फेब्रुवारी दरम्यान खेळवला जाईल. यामध्ये सहा संघ सहभागी होणार असून ही T20 लीग फ्रँचायझी आधारित आहे. अबुधाबी, दुबई आणि शारजाह येथील तीन मैदानांवर एकूण 34 सामने खेळवले जाणार आहेत.

दरम्यान, स्पर्धेची घोषणा करताना, आंतरराष्ट्रीय लीग T20 च्या आयोजकांनी सांगितले की, "अमीरात क्रिकेट बोर्ड रिलायन्स इंडस्ट्रीज (Reliance Industries), कोलकाता नाइट रायडर्स (Kolkata Knight Riders), कॅप्री ग्लोबल, GMR, लान्सर कॅपिटल, अदानी स्पोर्ट्सलाइन, ब्रॉडकास्टर झी आणि इतर सर्व भागधारकांचे UAE मधील नवीन T20 लीगमध्ये स्वागत करते. त्यांनी अमीराती क्रिकेट बोर्डावर विश्वास दाखवला आहे.”

ते पुढे म्हणाले की, “आम्ही या प्रदीर्घ प्रवासाला सुरुवात करत आहोत. आम्हाला विश्वास आहे की, एकत्रितपणे आपण नवीन उंची गाठू आणि या प्रक्रियेत जगभरातील लाखो चाहत्यांना मनोरंजन आणि उत्साह प्रदान करु.''